Århusimi kalaallit suliffissaaleqisut laajaasut

Danmarkimi kalaallit atugarliortut suliffeqarfinni sulileqqinnissaat anguniarlugu laajatut sulisinneqartarnerat immaqa aqqutissaavoq. Århusip kommuneata tamanna misilittagaqarfigaa. Århusimi Kalaallit Illuanni suliniut Grønlænderprojektimik taagorneqartoq atorlugu laajaasarneq aallartinneqaqqittoq iluatsilluarpoq.

Århusimi Kalaallit Illuanni kalaallit ullo'qeqqaniit pingasup tungaanut ataatsimoortarput. Ullaakkorsioqatigiittoqartarpoq taqussanillu taniisoqartarluni. Tamatuma kingorna suliartortarput. Taamaalillutik ikiorsiissutinik pisartakkamik saniatigut 12 kr. 50 oorinik nalunaaquttap akunnermusiaqarsinnaapput. Tamanna iluatsilluartoq Kalaallit Illuanni pisortap Svend Koltep ima oqaluaraa:

- Tupinnaannartumik iluatsilluarpoq. Aamma takusinnaavarput kalaallit taamatut sulisinneqarnertik nuannarigaat, Svend Kolte taama oqarpoq.

Aningaasaateqarfiup, Den Europæiske Socialfondip suliniut aningaasalersorpaa. Kalaallillu Århusimi najugallit ikiorsiissutinik siusinaartumilluunniit tigusartagallit suliniummi peqataapput. Taakku amerlanersaat aalajangersimasumik suliffeqarneq ilisimasaqarfiginngilaat immaqalu taamaammat laajaasarneq pisariaqartippaat, taama Mette Meilandt inuup inuiaqatigiillu pissusiinik ilinniagartooq suliniummi suleqataasoq isumaqarpoq.

- Kalaallit atugarliortut suliffeqarneq sungiusimasarinngilaat suliniummilu ullormut laajaasarnerminni ullormut suliamik iluatsilluartut misigigaangamikku suliartoqqinnissaminnut kajumilersarput , Mette Meilandt oqarpoq.

Suliniummi suliffeqarnermut siunnersortip sulisitsisullu akornanni akigitinniagaq isumaqatigiissutigineqartarpoq. Sulisitsisut ilaata sulisutik pillugit ima oqarpoq:

- Sulilluartorujussuummata allamik oqarsinnaanngilanga nersualaaginnarsinnaavakka. Akikitsuararsuarmik sulisorineri apeqqutaatinngilakka. Siornatigut efterskolertut sulisorisarnikuuagut taakkununnga sanilliullugit kalaallit sulisorisagut qiimaneroqaat nuannernerullutillu, Sulisitsisut ilaat Steen Møller Madsen oqarpoq.

Ukiup uuma naanissaata tungaanut laajaasarneq ingerlanneqassaaq.