Århusimi borgmesteri aamma tikeraassaaq
Danmarkimi umiarsualivik nunatsinnut nassiussisarfiusussaq illoqarfiit assiginngitsut pingasut pilerngutileruttorpaat. Ålborgimi, Esbjergimi Århusimilu kommunini atorfillit Namminersornerullutik Oqartussanit suliarinnittussarsiornermi suliakkiissutinik ippassaq tigusaqarput.
Esbjergip Ålborgillu borgmesterii Nuummut tikeraarlutik umiarsualivimminnik neqerooriartoreersut Århusimi borgmesteri Nicolaj Wammen suli tikeraarsimanngilaq.
- Qaammatip uuma naanerani tikeraarnissarput ilimagaarput. Uagut neqeroorutissarput naapertorlugu siunersuisartut Namminersornerullutik Oqartussani atorfillit neqerooruteqarniartullu akornanni juulip aqqaneq-aappaata tungaanut attaveqaqatigeeqqassaagut, Århusimi umiarsualivimmi pisortaq Bjarne Mathiesen oqarpoq.
Danmarkimi umiarsualivik nunatsinnut nassiussisarfiusartoq suliffissarpassuarnik kommunillu karsianut aningaasarpassuarnik iluanaarutaasussaammat illoqarfinnit pingasunit borgmesterinit pilerngunneqarpoq.
Ålborgimi umiarsualivik ukiorpassuarni nunatsinnut nassiussisarfittut umiarsualivigineqarpoq. Namminersornerullutilli Oqartussat Ålborgimilu umiarsualiviup akornanni isumaqatigiissutit arlallit atorunnaalermata umiarsualiviup taassuma atorneqaannarnissaa eqqarsaatersuutigineqalerpoq.
Illoqarfiit pingasut umiarsualivimmik atorneqarnissaanut neqeroorusiornerminni qanoq akeqartitsissanerlutik aamma naatsorsuusiuleruttorput. Umiarsualivik sorleq atorneqassanersoq septembarimi aalajangiisoqassaaq.
