Ålborgip borgmesteria tikippoq

- Nuannertuaannarpoq inuit nuannarisat naapeqqillugit, uannullu Kalaallit Nunaannukarneq immikkut misigisaqarfiujuaannarpoq. Ineriartortoqartoq misigisimasarpara, aamma misigisimasarpara Jyllandip avannaanitut inuit pissuseqartut, soorlulusooq oqartartut: Uagut nammineq pissuserput atorlugu iliuuseqassaagut, imaassinnaavoq allat silatunerusut, kisianni nuannisarneruppat?

Taama oqarpoq Aalborgimi borgmesteri Henning G. Jensen, ippassaq Aalborgimiit tikeraartut siuttuuffigalugit naalakkersuisut siulittaasuannut Hans Enoksen-ip ataatsimeeqatiginerata kingorna.

Umiarsualiviup Grønlandshavnen Aalborgip tigummiinnarnissaanut unammisunut ilaavoq, suliariumannittussassiuussinerlu ataatsimiinnermi eqqartorneqartunut ilaavoq.

- Grønlandshavni tigummiinnarusupparput siulliusussaatitaanngilagulli. Neriuppunga Aalborgi ajugaajumaartoq, Århusili Esbjergiluunniit ajugaassappat ataqqivara, Henning G. Jensen ataatsimeereernerup kingorna oqarpoq.

Kalaallit Nunaata Jyllandillu avannaata ikinngutigiinnerat immamut tunngasuteqaannanngilaq. Sakkortuumik immitsinnut attuumassuteqarpugut, tamannalu attattuaannarusupparput. Apeqqutaatinngilarput Grønlandshavnip sumut atalernissaa, borgmesterip ilanngullugu oqaatigaa.

Suliariumannittussarsiuussineq naammassippat Grønlandshavnip sumut atalernissaa septemberimi paasineqassaaq.