½ milliardit koruunit Nunatsinnik annaassiniarnertut atorneqarsimapput

Royal Greenlandip immikkut milliardip affaanik aasaq tapiiffigineqarnerani suliffeqarfissuup akiliisinnaassusia piinnarani, aammali Nunatta akiliisinnaassusiata uppernassusaanik annaassiniarnerusimavoq. Karl Lyberthip, Siumumeersup, § 36 aqqutigalugu apeqquteqarsinnaanini atormagu, Kuupik Kleistip taama akissuteqarfigaa. Milliardip affaanik ikiorsiissutaasimasut sunut atorneqarsimanersut saniatigut Karl Lyberth allanik aamma apeqquteqaateqarpoq.
decembarip 22-at 2009 05:18

Kuupik Kleistip akissutaa malillugu suliffeqarfiup akiliisinnaassusaata qulakkeerneqarnissaa, akiitsut aningaasallu uninngasuutit nalimmassarnerunissaat, suliffeqarfiullu ingerlatsinermut pitsanngorsaaneranut, aningaasat taakku aamma atugassiaasimapput, suliffeqarfiup tunisassiasa uninngaannartut ikilisarneqarnissaannut, akiitsunillu apparsaanermut taamaasillutik atorneqarsimallutik.

Karl Lyberthip aamma apeqqutigaa, Royal Greenland Nuummi ilumut illusiortorsimanersoq.

Tamannalumi Kuupik Kleistip ilumoornerarpaa, tassami Sisimiunut allaffissornerup ilaanik nussuisoqarnerani aningaasartuutinik qaffassaaqataasimammata.

- Nuummut uterteqqiisoqarpat aningaasartuutitigut suliffimmullu inuttaqarniartitsinerup ukiumut 2 aamma 3 millionit koruunit missaannik sipaarutaasinnaanera naatsorsuutigisariaqarpoq, Kuupik Kleist oqarpoq.

Taamaammat Royal Greenlandip Sisimiuni inissiat arlallit tunisimavai, Nuummilu nutaanik pisiortorluni. Pisisimanerlu 5,8 millionit koruuninik naleqarsimavoq, aningaasaliinerli taanna ukiut pingasut ataallugit imminut akilissasoq, Kuupik Kleistip erseqqissaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq