Zinkimik nunatta avannaarpiarsuani piiaaffeqalernissaq qanilliallappoq
Tunup avannaani, Citronenfjorden-imi zinkimik ilimagisamik annertunerusumik Ironbark Zinks nassaarnermi kingorna, piiaanissamut aningaasanik naammattunik peqalernissartik siunertaralugu, pappiaqqanik nalilinnik pisisussarsiulernera iluatsikkiartorpoq.
Aningaasaliisussarsiorneq ingerlalluartoq, nittartakkami proactiveinvestors.com allaaserineqarpoq.
Pappiaqqat aningaasanik nalillit 11,5 millioni dollarsit, qallunaat aningaasanngorlugit 60 millioni koruunit, Citronen Fjorden-imi pilersaarummut illuartinneqarsimapput.
2013-mi zinkimik piiaasoqalersinnaanissaa ilimanarlivoq, aningaasaliissutit amerlinerisigut, Ironbark Zinks nittartakkaminni taama nalunaarput.
Kalaallit Nunaanni naalakkersuisut akuersinissaat, piiaanialernermi taamaallaat utaqqineqarpoq, aammalu utaqqineqarpoq nunarsuatsinni zinkip akitsornissaa. Aamma piiaanerup imminut akilersinnaanissaanut misissuinerit suli naammassinngitsut utaqqineqarlutik.
Zinkimik piiaasoqalissappat, Tunup avannaani inuilaami attaveqarnermut atortorissaarutinik qanoq sanaartortoqartiginissaa suliffeqarfiup MT Højgaardip maanna nalilersorpaa.
