Franskit TV-atigut arsallammak Zinedine Zidane arsarluni nunarsuarmi pissartanngorniutivinnermi italiamiu Marco Materazzi sakiaatigut niaqummikkamiuk unnummut utoqqatsissutigaa.
- Meeqqanut tamanut isiginnaartunut isumakkeerfigeqqugaluarpunga. Taamalli pissusilersornera utoqqatsissutissaqanngilaq.
Inuit milliardit pingasut missaanniittut tv-kkut isiginnarmata, meeqqallu millionilippassuit taakkununnga ilaammata, pisoq isertunngivillunga oqaluusererusuppara, Zidane oqarpoq.
Aperineqaramili taamak kamannartigisumik italiamiut kinguarsimasuat qanorpiaq oqarsimanersoq akiinnarpoq:
- Anaanannut qatanngutinnullu tunngavoq, Zidane akivoq.
34-nik ukiulik Zidane arsartartuunini pissartanngorniutivinnermi anisitaanermik naggaserpaa.
Tuluit aviisiat The Times qarngup aalaneratigut oqaatsinik paasinnissinnaasoq atorlugu misissueqqissaartitsisimapput.
- Pinerliiniat atortittartuata erneraatsit, nigorit! Misissueqqissaartartup Materazzi taamak oqarsoraa.
Nunat tamalaat arsartartunut kattuffia – FIFA – aalajangersimavoq pissartanngorniutivinnermi qanoq pisoqarsimaneranik pisortatigoortumik misissuisitsiniarluni.