Zimbabwemi qinerseqqinnissamut piareersimapput
Zimbabwemi illuatungiliuttut partiiata MDC-p præsidentimut qinigassanngortitaa, qinerseqqittoqassagaluarpat piareersimavoq.
Allattoq Louise M. Kleemann
Morgan Tsvangirai siusinnerusukkut oqaraluarpoq, qinerseqqittoqarnissaa pisariaqanngitsoq, marsip 29-anni præsidentimut qinersisoqarmat qinersisut affaat sinnerlugit nammineq pissarsiarereeramigit.
Morgan Tsvangirai ullumi Afrikami kujallermi naalagaaffiup tv-qarfianut oqarpoq, qinersinermut peqataaqqinnissaminut piareersimalluni – piumasaqaateqarlunili.
- Afrikap Kujataamiut Suleqatigiiffiannit aamma nunarsuarmioqatigiinnit nakkutilliisoqanngippat qinersinermi peqataarusunngilagut, præsidentimut qineqqusaartoq Tsvangirai ullumi taama oqarpoq.