Zimbabwemi pissutsit ajorsiartuinnarput

Zimbabwemi illoqarfinni allani perusuersartarfiit imeqarniarnerlu ajungaarmata nappaammik koleramik inuit 6.000-it tunillatsissimapput, 300-llu toqoreerlutik. Napparsimasut Afrikamut Kujallermut katsorsartikkiartornissartik kisiat periarfissarilerpaat, ikinnerpaalli tamanna akissaqarfigaat. USA-mi præsidentiusimasoq, Jimmy Carter FN-imilu pisortaasimasoq, Koffi Annan, pissutsit nalilerniarlugit Zimbabwemut iserniarsarigaluaramik suli iluatsitsinngillat.

Jimmy Carterilli oqaatigaa pissutsit ilimagisamiit ajornerusut qularinagu, naalakkersuisullu iluarsiinissaminnut pissaaneqanngimmata pissutsit ilungersunarsiartuinnartut. Zimbabwemi upernaarli tatiginartunik naalakkersuisoqanngilaq. Siullermik Mugabe peqquserlulluni ajugaaniaqqaaraluariarluni, illuatungiliuttut naalakkersuisoqatigileraluaramigit politiit pissaaneqarfiginerat iperarnaveersaarpaa, namminerminut akerliusut politiinut qunusiaritittaramigit. Zimbabwemi naalakkersuisuutitaqarniartut Afrikami Kujallermi ullumi isumaqatigiinniartussaagaluarput, iluatsitsinissaalli ilimagineqanngilaq, minnerunngitsumik pissutsit ilungersunarluinnarnerat Mugabep miserratigiuarmagu. Afrika Kujallermiit sivisuumik akuleruttoqarusunnikuunngilaq, tulliullunili præsidentinngortussaq, Jacob Zuma oqarpoq Zimbabwemi pissutsit maannakkut akuersaarneqarsinnaanngilluinnalersut taamaammallu akuliuttoqartariaqalersoq. Jacob Zumali qanorpiaq iliuuseqarniassanersoq ilisimaneqanngilaq.