Zimbabwemi pissanganartorsiorfiuvoq
Qinersinermili peqquserluttuliortoqarsimanissaa aarleqqutigineqarmat Zimbabwe najummassimanartorsiorfiusoq, Malin Dorph Mellemfolkeligt Samvirkemeersoq oqarpoq:
- Qinersinermi inernerit innuttaasunit utaqqimaarneqarput, pissanganartorsiorfiullunilu. Naalakkersuisunut illuatungiliuttut inernerit saqqummiunneqarsimannginnerat tupigusuutigaat, sumiiffinni assigiinngitsuni inernerit ilaannakortut ippassaq ullaakkulli saqqummiunneqareermata, Malin Dorph oqarpoq.
Zimbabwep ukiuni 30-nngulersuni præsidenterisimasaa Robert Mugabe qinersinermi ajorsarsimanersoq suli ilisimaneqanngilaq, eqqoriaanerilli siusippallaassasut oqaatigineqarluni.
Arfininngormat qinersisoqaramt inatsisartunut qinersisoqarnera peqatigalugu Zimbabwemi præsidentissarsiortoqarpoq.
Siornatigut qinersisoqarsimagaangat qinersiviit matusimatsiaannartut inernerit saqqummiunneqartarsimagaluarput, ullumikkulli taamaattoqanngilaq. Taamaammat pissutsit najummassimanartorsiorfiupput.
Naalakkersuisunut illuatungiliuttut qinersinermi ajugaasuusimanertik suaarutigereerpaat.
Robert Mugabep unammillertai tassaapput illuatungiliuttut siuttuat Morgan Tsvangirai, siornatigullu aningaasaqarnermut ministeriusimasoq Simba Makoni.
Tsvangirai-imik tapersersuisut oqarput Tsvangirai 67 procentinit qinerneqarsimasoq, qinersinermili aqutsisut præsidentissarsiorneq pillugu suli oqaaseqanngillat, inatsisartunullu qinersineq kisiat oqaaseqarfigisimallugu.
Qinersiviit arfinillit pillugit oqaaseqarnerminni qinersinermi aqutsisut oqarput illuatungiliuttut qinersivinni pingasuni ajugaasuusut naalakkersuisullu pingasuni aamma ajugaasuusut.
Zimbabwemi aningaasaqarniarneq ajornartorsiorfiuvoq, aningaasallu naleerukkiartuinnavillutik.