Zimbabwemi Mugabe illuatungiliuttunik isumaqateqarpoq
Zimbabwemi naalakkersuinikkut illuatungeriit ukiup affaani akerleriillutik nikeriarsinnaasimanatik kiisami Robert Mugabe illuatungiliuttullu naalakkersuinermik ingerlatseqatigiinniarlutik isumaqatigiipput. Zimbabwemili inuit piitsooqaat, nerisassaaleqillutillu suliffissaaleqipput, suullu tamaasa amigaatigalugit.
Allattoq Louise M. Kleemann
Illoqarfiit pingaarnersaanni Hararemi aviisit nutaat tuniniaasartut tigoorarpaat. Aviisimi The Heraldimi kiisami naalakkersuisut isumaqatigiinnerat qulequtarineqarpoq. Ammami innuttamik ajornartorsiutaasa aaqqiiffigineqarnissaat naalakkersuisut pimoorullugu aalluttariaqalerpaat. Innuttaasut kikkut sutut ivertineqarnissaat soqutigivallaanngilaat, ajornartorsiutiminnik ikiorneqarunik naammagalugu. Zimbabwermiulli naalakkersuinermik sulialit isumaqatigiissimanerisa kingunerannik pissutsit iluarseriarnissaat ilimagivallaanngilaat, takussaasunillu aaqqiissuteqartalerpata aatsaat uppersinnaallugit oqalullutik.