Zimbabwemi aqagu qinersissapput
Præsidentissarsiorluni aqagu tallimanngornermi qinerseqqittoqartussaavoq, taamaattumik Tsvangiraip Mugabe illutungiliuttunik isumaqatigiinniarnissamut nalunaaquttap akunnerinik 24-inik periarfissikkusuppaa.
- Mugabeli isumaqatiginninniarusunngippat aqagulu imminut præsidentissarsiornermi ajugaasutut suaarutigissappat tamanna inatsisinik unioqqutitsinerussaaq, Mugabemi innuttaasunik toqoraanermut akisussaavoq, Tsvangirai oqarpoq.
Afrikap kujasinnerusuani nunat suleqatigiiffiani SADC-imi Zimbabwemi pisut pillugit ippassaq ataatsimeereerlutik kajumissaaripput præsidentimut qinerseqqinnissaq kinguarteqqullugu, tamannali 84-inik ukiullip Mugabe-p tusaarusunngilluinnarpaa, soorluttaaq nunat tamalaat isorinninnerat tusaarusunngilluinnaraa.
Ukiuni 28-ini siuttuunini Mugabep nanginniarpaa.
Zimbabwemi qinersinermut inatsisit malillugit Morgan Tsvangirai marsip ulluisa 29-ianni qinersinermi ajugaasuugaluarpoq, taasinerilli inerneri maajip ulluisa aappaanni aatsaat saqqummiunneqarmata paasinarsivoq taasinerit affai sinnerlugit pissarsiarisimanngikkai, taamaattoqaraangallu ullut 21-it qaangiutsinnagit qinerseqqittoqartussaasarpoq.
-Taamaattoqanngimmalli illuatungiliuttuni Tsvangirai taaguunneqarnerugami ajugaasutut suaarutigineqartussaasimagaluarpoq, qinersinermik ilisimasalik oqarpoq.