Zimbabwemi aningaasat naleerutilivipput
Zimbabwemi aningaasarliortoqarnera ilumut takussutissaqalerpoq, aningaasaq 100.000 milliardit dollarinik nalilik, maanna pineqarsinnaalermat. Zimbabwep dollariinik aningaasarpassuit taakku 1700 koruunit missaannik naleqarput. Danmarkip radiuata nittartagaani tamanna atuarneqarsinnaavoq.
Allattoq Lotte Holm
Aningaasat piffissap sivikitsup iluani sukkasuumik naleerukkiartuinnarnerat malinnaaviginiarlugu Zimbabwep qitiusumik aningaasaateqarfia 100.000 milliardit dollarinik nalilimmik saqqummersitsisariaqarsimapput. Zimbabwemi aningaasat qaammatialunnguit ingerlanerinnaanni 89.700.000.000.000 milliardit procentinik nalikillisimapput.
Zimbabwe 1980-imi namminersulivimmat Robert Mugabe præsidentinngorpoq, aningaasallu tuluit aningaasaannut pundinut assingusumik taamani naleqarsimasut ullumikkut allanngorsimaqaat.