Zimbabwe sorsunnermut pinerlunniarnermullu atuisutut isigineqaleriaannaavoq

Zimbabwe nunat diamantimik tuniniaasut akornanni nutaanerpaatut aallartimmat ukioq ataaseq suli qaangiutinngilaq. Kisianni suut tamarmik pissusissamittut ingerlanngillat. Maanna nuna taanna Afrikamiittoq diamantinit isertitanit sorsunnermut pinerlunniarnermullu atuisutut isigineqaleriaannaavoq.

Diamantimik Zimbabwep kangisinnerusortaani aasaq kingulleq nassaartoqarpoq.

Inuit 15.000-init ikinnerunngitsut nassaarfiusumukaapput, nunamilu aappaluttumi paneqisumi assaannarminnik assaallutik aallartillutik.

Immikkut ilisimasallit naliliinerat naapertorlugu diamantit 835 millioni koruuninik nalillit tamaanngaanniit isertortumik aallarunneqarsimapput.

Diamantisiorlutik assaasut Zimbabwep naalakkersuisuisa pinngitsaalillugit siorna septembarimi peersippaat.

Kisianni diamantisiorneq taamaatinneqanngilaq. Unioqqutitsillutik diamantisiortut taarserlugit politiit sakkutuullu akilernerlugaaqalutik diamantisiortinneqalerput.

Tamatumunnga peqatigitillugu tuluit aatsitassarsioqatigiiffiat diamantisiorsinnaanermik pisisimasoq anisinneqarpoq. Taarsiullugu suliffeqarfik naalagaaffimmit pigineqartoq diamantisiortinneqalerpoq, naak naalagaaffiup eqqartuussissuserisuata tamanna inatsisinik unioqqutitsisuunerarlugu uparuaraluaraa.

Taamanikkulli Zimbabwemi diamantisiorneq ingerlanneqarpoq, naak qanorpiaq ingerlanneqarnera ersernerlukkaluaqisoq.

Præsident Robert Mugabep suleqataasa qaninnerit ilaat illoqarfiup Hararep timmisartoqarfiani diamantinik suliareqqinneqanngitsunik annertuunik nassataqarluni ukiormanna marsimi aallalersoq unitsinneqarpoq.

Aatsitassarsiornerup silarsuaani pasitsaassimaneqarpoq, diamantisiornermit iluanaarutit præsident Mugabep partiiatalu siuttuisa pisuunngorsaatigisaraat.

Tamakkua tunngavigalugit nunat tamat akornanni diamantisiornermi kattuffiup Zimbabwemi diamantisiornermi pissutsit misissorniarpai.

Diamantisiornermi kattuffiup Zimbabwe ilaasortaaginnassanersoq maanna nalilersortussanngorpaa.