Zimbabwe-mi qinersinerup inerneri kiisami saqqummiunneqarput

Zimbabwemi præsidentimut qaammatip ataatsip missaata matuma siorna qinersoqarmalli inernerit pisortatigoortumik kiisami saqqummiunneqarput. DR-imi taama allaaserinnittoqarpoq.
maajip 02-at 2008 06:22

Qinersinermut Zimbabwemi ataatsimiititaliap nalunaarutigaa illuatungiliuttut siulittaasuat, Morgan Tsvangirai amerlanerpaanit taaguunneqarsimasoq, qinersisaali aamma ima amerlatiginngitsut, ingerlaqqissinnaanani.

Tsvangirai 47,9 procentinik taaguunneqarpoq, præsident Robert Mugabe 43,2 procentinit taaguunneqarluni.

Zimbabwemili innuttaasorpassuit qinersinerup inernera eqqortuunersoq upperivallaanngilaat. Illuatungiliuttut qularutiginngilaat ukiuni 28-ni præsidentiusimasup Mugabe-p taasinerit kisinneqarneranni qinersinermut ataatsimiititaliaq peqquserloqqusimassagaa. Inernerit sapaatip akunnerini kingullerni marlussunni arlaleriarlutik kisinneqaqqittarsimapput.

Illuatungiliuttut præsidentimut qinersinermi ajugaasuunertik qangali suaarutigereerpaat, qineqqusaartoqaqqinnissaalu kissaatiginngilaat.

Morgan Tsvangirai-ip Zimbabwemiinnissani merseraa, Sydafrikamullu qimaasimalluni, qineqqusaartoqqinnissaalu akuersaarumanngilluinnarpaa.

-Qanoq ililluni qineqqusaartoqaqqissinnaava, Mugabe qaammatip kingulliup ingerlanerani persuttaanerpassuarnik ingerlatsereersorlu, aamma uagut partiitsinnik illersuisorpassuit toqoraaniaqatigiinnit saassutsittarsimavai, Morgan Tsvangirai oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq