Zimbabwe-mi qinersineq illuatungiliuttup kinguarteqquaa
Zimbabwemi illuatungiliuttut siuttuata naalagaaffiit Afrikap kujasinnerusortaaniittut qinnuigai Zimbabwe-mi præsidentinngorniulluni qinersinerup immikkoortuata aappaata kinguartikkallarnissaa sulissutigissagaat.
Allattoq Louise M. Kleemann
Zimbabwemi illuatungiliuttut siulittaasuata Morgan Tsvangirai-p nammineq kissaatigaa tallimanngorpat qinersinissap kinguartinnissaa. Tsvangerai oqarpoq Afrikap kujasinnerusortaaniittut nunat suleqatigiinnissamut isumaqatigiissutaanni qinersinerni najoqqutassat naapertorlugit Zimbabwemi præsidentissarsiornerup immikkoortuata aappaa ingerlanneqartariaqartoq. Tsvangerai USA-mi radiot arlaannut aamma oqarpoq Mugabe qinersinermi martsimi ajorsarami tunuaannartariaqaraluartoq.