Zimbabwe-mi qineqqusaarnermi illuatungiliuttoq tunuarpoq

Zimbabwemi partii aqutsisuusoq, ZANU-PF, qineqqusaarneq suli ingerlanniarlugu uteriiserpoq, naak illuatungiliuttoq, Morgan Tsvangirai, præsidentinngorniunnermit ippassaq tunuaraluartoq.
Allattoq Louise M. Kleemann
juunip 23-at 2008 08:24

Qineqqusaarnerup nalaani nakuusernerpassuit pissutaallutik kiffaanngissuseqartumik eqqortumillu qinersinissaq pisinnaanngimmat Tsvangirai qineqqusaarnermit ippassaq tunuarpoq. Illuatungiliuttup ilanngullugu oqaatigaa, isummani allanngorsimanersoq pingasunngorpat nalunaarutigiumaarlugu.

Tamanna pinngippat Zimbabwemi ukiorpassuit naalakkersuisuusimasoq, Robert Mugabe, præsidentinngorniunnermi siullermi, tallimanngorpat naammassisussami, kisimiilissaaq.

Præsidentinngorniunnermi siullermi Morgan Tsvangirai ajugaagaluarpoq, qinersinermulli ataatsimiititaliaq naapertorlugu 50 procentinit taaguunneqannginnami ajugaasinnaanngitsoq ataatsimiititaliap ilisimatitsissutigisimavaa. Qineqqusaarnerup nalaani peqqarniisaarnerni inuit 86-it maannamut toqutaapput, 200.000-illu angerlarsimaffimminniit qimaasariaqarsimallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq