Zelenskyjip USA-mi Kongressi ataatsimeeqatigissavai Bidenilu naapissallugu
Zelenskyj ullumi pingasunngornermi USA-liassaaq, USA-milu politikerit nuiamasut tassani ataatsimeeqatigissallugit.
USA-mi nutaarsiassaqartitsivik Punchbowl News, suliamut atatillugu ilisimannittut qulingiluat oqaloqatigereerlugit taama allaaserisaqarpoq.
Ukrainep præsidentiata Zelenskyj-p innuttaasut sinnerlugit sinniisoqarfimmi, tassa Repræsentanternes Husimi Senatimilu siuttut naapissavai.
Ukrainemiut præsidentiata Zelenskyjp ullumi pingasunngornermi Amerikap præsidentia Joe Biden amerikamiut inatsisartoqarfianni Washington D.C-miittumi naapissavaa.
Taama præsidentip illorsuaniit Det Hvide Husimiit nalunaarput.
Russit saassussimmatali nunani aatsaat qimakkaa
Russit nunamut sanilerisaminnut Ukrainemut februaarimi saassussimmatali aatsaavissuaq Ukrainemiut præsidentiata nunani qimakkini Zelenskyjp nammineerluni oqaatigaa.
- USA-liarpunga Ukrainep nukittussuseqarnera imminullu illersorsinnaassuseqarnera suli nukittunerulersinniarlugu, Ukrainemiut præsidentiat Twitterikkut taama nammineerluni allassimavoq nangipporlu:
- Præsident Joe Bidenilu Ukrainep USA-llu qanoq suleqatigiissinnaanerat pillugu oqaloqatigiissutigissavarput. Taanna unnersiorpoq.
Amerikamilu qaffasissumik atorfilittat ilaata aamma nutaarsiassaqartitsivimmut Reutersimut uppernarsarpaa, oqarluni Biden Ukrainemut sakkunik to milliarder dollarit missaanni nalilinnik tunniussilersaartoq.
Zelenskyjs USA-mut tikeraarpoq Russit Ukrainemut saassussiniarlutik isaaneraniit ullut 300-t qaangiuttullu.