Zarqawip kingoraartissaa ilisarnanngilaq
Peqqarniisaartartut pisortaat, al-Zarqawi, amerikamiut timmisartumiit saassussillutik sapaatip-akunnera kingulleq toquppaat. Angut nuna allamiu ilisarnanngilluinnartoq al-Zarqawip kingoraartissaatut al-Qaedakkut Irakimi immikkoortortaqarfiata toqqarpaat.
Taanna tassaavoq Abu Hamza al-Muhajir, angumillu taassuminnga USA maanna ujaasilerpoq:
- Zarqawip kingoraartissaa inuit pinerluuteqarsimasut ujaarisatta allattorsimaffiini akuugunarpoq, USA-p præsidentia, George W. Bush, oqarpoq. Ajornartorsiut tassaaginnarpoq, kina ujassallugu amerikamiut ilisimanngilluinnarmassuk. Ateq al-Muhajir ”nunasisumik” arabiamiusut isumaqarpoq, tamatumalu paasinarsisippaa, al-Muhajir irakimiuunngitsoq. Peqqarniisaartarnermik ilisimasaqarluartoq, Ruhan Gunarratna, isumaqarpoq, al-Zarqawip peqqarniisaartarneranut assingusumik Irakip avataani iliuuseqartarneq al-Qaedap ingerlatiinnarniaraa.
- Irakimi pikitsitsisut allat al-Qaedap isumakkeerfigeqatigerusunngikkai aamma erserpoq, peqqarniisertarneq pillugu ilisimatusartoq, Anja Dalgaard Nielsen, oqarpoq, nangillunilu:
Abu Musab al-Zarqawimit inuppalaarnerusumit al-Qaeda-p pisortassarsiussalluni toqqarsimanngivippaa. al-Qaedap Irakimi immikkoortortaqarfiata taamaalilluni ersersippaa, siullermik: sakkutuut isaannit isigalugu, al-Qaedap Irakimi immikkoortortaata qularinngilluinnarpaa, peqqarniisaartarneq ingerlatiinnarsinnaagitsik, naak Irakimi innuttaasut amerlanersaasa tamanna akerlerigaluaraat – aappassaatut taasinnaavarput, politikkikkut isigissagaanni, al-Qaedakkut Irakimi immikkoortortaqarfiata uivernissartik soqutiginerugaat, naalakkersuisut akuerisinnaasaannik iliuuseqarnatik, uffa innuttaasut tamanna tapersersornerussagaat ilisimagaluaripput.
