Zargawip toqutaanera qiimmattaatigineqarpoq

Peqqarniisaarniartartut siuttuata Al-Zarqawip Irakimi toqutaanera amerikamiunit qiimmattaatigineqarpoq.

- Irakimi saassussigatta paasissutissanik katersivugut, amerikamiut sakkutuuisa naalagarsuat Irakimiit taama oqaluttuarpoq.

Zarkawip al-Qaedamilu ilaasortat allat tallimat Bagdadip avannamut kangianiittut tassuma sakkutuuisa ullumi qaartartumeerlugit toquppaat taamaaleriarlutik pappilissanik katersigamik paasissutissarpassuarnik pissarsipput.

Inuup kiinaata aagasattup assinga qalipaateqanngitsoq, Zargarwimullu assigusoq, ullumi amerikamiut sakkutuuisa avammut saqqummiuppaat. Inuup assimiittup qilerui kakiortinnerilu Zargarwip qileruinut kakiortinnerinullu assigusorujussuummata amerikamiut isumaqarput toqukkumasartik eqquuillugu toqutsisimallutik.

Zargarwip sumiinneranik paasiniaasoqarnerani qaartartumeeriffiup nalaani najugaqartut ikiuisimapput. Zargarwip sumiinnerani ilisimannittut USA-mit 150.000 millioni koruuninik akilerneqarniarlutik neriorsuiffigineqarsimanerat immaqa taakkunannga ilisimaneqarsimavoq.

Zargarwip amerikamiut sisamat nammineq niaquersimagai ilisimaneqarpoq. Taassumalu saniatigut aagasaaqisumik saassussisaqattaarnerit Zargarwip akisussaaffigai.

Præsident Buship Zargarwip toqutaanera ajugaanertut nalunaarutigisinnarlugu ima nangippoq:

- Zargarwi toqutaagaluartoq peqqarniisaarniat allat saassussisaqattaarnissaat ilimagissavarput. Sunnisiortut shiasiortullu imminnut sorsuunnerat suli piujuassasoq aamma ilimagissallutigu, præsident Bush oqarpoq.