Zacharias Kunuup filmiliaa “One Day in the Life of Noah Piugattuk-mik” (Noah Piugattuup inuunerani ullut ilaat, aaqq.) qulequtaqartoq nunani assigiinngitsuni filmilianik Torontomi nittarsaassinersuarmi takutinneqassaaq.

Zacharias Kunuup filmiaa Toronto International Film Festivalimi takutinneqassasoq

Naggueqatigiit Inuit ilaat Zacharias Kunuk filmiliortartuusoq filmiliaminik nutaajusumik nunani assigiinngitsuni filmilianik Torontomi nittarsaassinersuarmi takutitsiartornissaminut aggersarneqarpoq.

Zacharias Kunuup filmiliaa “One Day in the Life of Noah Piugattuk-mik” (Noah Piugattuup inuunerani ullut ilaat, aaqq.) qulequtaqartoq nunani assigiinngitsuni filmilianik Torontomi nittarsaassinersuarmi septembarip ingerlanerani takutinneqartussatut immikkut ittumik toqqagaasut ilagaat.

Filmiliaa Qeqertaalummi 1961-imi pisut piviusut tunngavigalugit suliaallunilu Qeqertaalummi immiunneqarpoq.

Filmiliaata imarisaa Noah Piugattumut naggueqatigiillu Inuit nuttartuusimasunut Qeqertaalummi nunassissimasunut taamatuttaaq Inuit ukiut hunnorujukkuutaani arlalinni aammalumi Noah 1900-mi inunngormalli ilaqutaata ileqqorisimasaattut qimusserlutik pinialuttarsimasunut tunngavoq.

Kisianni angut qaqortumik amilik BOSS-imik Naalakkamilluunniit taaguteqartoq piniartut tammaarsimaarfiannut tikippoq. Angut taanna Canadami taamanikkut oqartussaasunit aallartitaasoq naggueqatigiit Inuit illoqarfimmut annermut nuunnissaannut piniartutullu inuusaasitoqqaminnik asoorussinissaannut killiiartortitaasimavoq.

Filmiliaa piniartut ilungersuarujussuarnerannik malitseqartunik kinguneqapiluttussanik nalaataqartarsimanerannut tunngavoq. Naggueqatigiit Inuit inuiaqatigiittut atugaannik allannguerujussuarnerit Issittup ilaani ukiuni taakkunani pimmata filmiliaa oqaluttuarisaanerannut attuumassuteqarluinnarpoq.

Zacharias Kunuup naggueqatigiit Inuit inuusaasitoqaviat pillugu filmiliortartuunini ilisimaneqaatigaa.

Zacharias Kunuup filmiliaa filmilianik Venedigimi nittarsaassinersuaq maajimi ingerlanneqarmat nunarsuarmi takuteqqaarneqarpoq, filmiliaatali imarisaa Canadami inuiaqatigiit naggueqatigiit Inuit 1900-kunni eqqunngilluinnartumik pineqartarsimanerat pillugu nassuerutiginnittartut amerliartornerannik ersersitsisuummat Torontomi takutinneqarnera immikkut ittuuvoq.

Filmiliat nittarsaanneqartartut nunarsuarmi pissutsinik allannguinissanut iluaqutaanissaat siunertaralugu Torontomi nittarsaassinersuit ingerlanneqartarput. Soorlu Zacharias Kunuk tamatigut aamma taama siunertaqarluni filmiliortartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat