Zacarias Mossaoui inuunermi sinnera parnaarussaassaaq

Peqqarniisaartartunut Al-Qaedamut ilaasortaq, Zacarias Moussaoui, USA-mi 2001-imi septemberip ulluisa aqqarnganni, peqqarniisaartoqarmat peqataasimasutut inuunermi sinnera ippassaq unnukkut parnaarussassanngortinneqarpoq.

Massaouip toqumut pillagaanissaanik unnerluussisup piumasaralua, taamaalilluni pinngitsoorpoq.

Peqqarniisaarnermut atatillugu unnerluussaasuni kisiartaalluni Zacarias Mossaoui toqumut pillagaavoq.

USA-mi præsidentip, George W. Buship, pisoq pillugu oqaaseqarnermini, erseqqissaatigaa, nammineq isummani malillugu oqassaguni Mossaaoui naleqquttumik eqqartuunneqartoq. Ilanngullugu oqarpoq, eqqartuussivimmi aalajangiiniartitaasut Mossaaouip toqumut pillagaannginnissaa aalajangersimagaat, namminerli amerikamiut sunngitsut taama pissanngikkaluarini.

- Eqqartuussinerup taama naammassineqarnera isumaqarpoq, pisoq unitsinneqartoq, peqqarniisaarnermulli akiuiniarneq unitsinneqanngilluinnarluni, præsident Bush oqarpoq.

Inuinnaat eqqartuussivimmi aalajangiiniartitaasut qulingiluat nalunaaquttap akunnerini 41-ni aalajangerniarsaripput. Mossaaouip peqqarniitsuliornini pissutigalugu toqumut pillagaanissaa inuit aamma taakkorpiaat apriilimi aalajangeraluarpaat, maannali tassa inuunermi sinnera parnaarussaasussanngorpoq.

Aalajangiisusaatitaasut taama aalajangernerminnut pissutaanerarpaat, taanna angut 37-nik ukiulik tassaasoq, inunnguakkuluk septemberip ulluisa aqqarnganni peqqarniisaarnermut annikitsuinnarmik ilisimasalik.

Mossaoui oqamiinnarsimavoq: USA ajorsarputit – uanga ajugaavunga!