Yemenimi sakkutuuleqqinnissamut USA piareeqqavoq
Timmisartoq USA-mi Detroitiliartoq Juullerujussuarmi qaartartumeerniarneqareersorlu Obama taama nalunaaruteqartoq, Danmarks Radio allappoq.
Qaartartumeeriniat Al-Qaedakkunneersut pillarneqarnissaat pillugu USA Yemenimi sakkutuuliiniarpoq.
Umar Farouk AbdulMutallabip Nigeriameersup timmisartoq decembarip 25-ani qaartinniarsarigaluarpaa, Al-Qaedakkullu pillarniarlugit aningaasaliissutissanik Obama noqqaassuteqarpoq, sakkutuulinissarlu allaat eqqarsaatersuutigineqarsinnaasoq oqaatigineqarluni.
Peqqarniisaarniartarnerit pillugit Nunat allanut tunngasunik Danmarkimi ilisimatusarfimmi ilisimatuup Martin Harrowip USA-p Yemenimi sakkutuuliiniarnera tupigusuutissaannginnerarpaa:
- Peqqarniisaarnianik akiuiniarneq aallarnerneqarmat ilaatigut oqaatigineqarpoq Nunarsuaq tamakkerlugu akiuiniartoqassasoq, taamaammat tupinnanngilaq USA Yemenimi sakkutuuliiniarmat, Martin Harrow oqarpoq.