X-faktor miliuuninit marlunnit isiginnaarneqarpoq
Tallimanngormat Danmarkip TV-agut erinarsullammaat X-faktorimi unammineranni aalajangiiffiusumi danskit isiginnaartut atsaat taama amerlatigalutik, miliuunit marluk sinnersimavaat, nunatsinni malinnaasut ilanngunnagit; angerlarsimaffinnilu unnussiaarluartoqarsimaqaaq.
Allattoq Elisa Isaksen
Martin Laurallu unamminerat TVkkut isiginnaartut 80 procentiisa pissangaqalutik malinnaavigisimavaat.
DR aallartimmalli TV-kkut aallakaatitassiamik aalajangersimasumik ataatsimik isiginnaartut aatsaat taama amerlatigalutik 2.196.000-iusimapput.
Nunatsinnissaaq assingusumik aallakaatitsinissap pilersaarusiornera inaarsarneqaleruttorpoq, ullunilu qaninnerni pisussat saqqummiunneqarumaarput.
Pilersaarutilli siumungaaq paaserusukkaanni nittartagaq www.inuvoice.com iserfigalugu tipisiuisoqarsinnaavoq.