WWF: Kalaallit Nunaat maligassiuisuuvoq
Pinngortitaq pillugu nunarsuaq tamakkerlugu suliniaqatigiiffiup WWF-ip allaaserisaa taama qulequtserneqarsimavoq.
Erngup nukinganik nukissiorfiup tallimassaata Ilulissat eqqaanni Paakitsumi sapaatip-akunnerup massuma ingerlanerani ammarneqarneranut atatillugu WWF taama allaaserisaqarpoq. Nukissiorfiup ammarneqarneratigut Nunatsinni innaallagissamik kiassarnermillu pilersuinerup 70 procentia nukissamik ataavartumit pivoq.
Paakitsumi imermik nukissiorfiup uuliamik ukiumut 9 millionit liiterinik atuineq taarserpaa, imermillu nukissiorfiit Nunatsinni tallimat atorneqarneranni CO2-mik aniatitsineq 174.000 tonsinik annikinnerulersoq, WWF-ip allaaseraa, taamatullu ineriartortoqarnera nuannaarutiginerarlugu:
- Silap pissusaata allanngoriartornera Kalaallit Nunaanni malugineqartorujussuuvoq. Ataavartumillu nukissiuuteqarnissaq pillugu suliniuteqartoqarnera nersorneqartariaqarpoq. Nunallu allat silap pissusaata allanngoriartorneranik akiuiniarlutik iliuuseqarnissaminnut Kalaallit Nunaannit isumassarsisinnaapput, Pinngortitaq pillugu nunarsuaq tamakkerlugu suliniaqatigiiffiup qullersaa Gitte Seeberg nersualaarinninnermini ilaatigut allappoq.
- Kalaallit Nunaanni nukissiuutit annertunersaat nukissiuutinit ataavartunit pisuunerat nuannaarutissaavoq. Silap pissusaata allanngoriartornerata akiorniarneqarnissaa taamaallaat pinnagu aamma aningaasarsiornermut iluaqutaasinnaasoq Kalaallit Nunaanni politikerinit pingaartinneqarpoq, Seeberg aamma oqarpoq.
Kalaallit Nunaannili pisuussutit uumaatsut iluaqutiginiarneqarneranni piujuaannartitsinissaq aallaavigalugu nukissiuuteqarnissaq Kalaallit Nunaanni politikerit piumasariaqaraat, Gitte Seebergip ujartorpaa:
- Aatsitassarsioqatigiit Kalaallit Nunaanni suliniartut nukissiuuteqarnikkut qanga pissutsit atuuttut atorniarpaat, tassa nukissiuutit mingutsitsisut, CO2-millu aniatitsingaatsiartut, Gitte Seeberg oqarpoq.
Paakitsumi nukissiorfik Nunatta karsianit attartornikkut sananeqarpoq, katillugillu 600 millionit koruuninik akeqarnikuulluni.
