WWF-ip saqqummiussinera mitalliineruneragaavoq
Aalisarnermut naalakkersuisoq Nikolaj Jeremiassen isumaqarpoq Pinngortitaq pillugu nunarsuaq tamakkerlugu suliniaqatigiiffik, WWF, sattalluni oqaluttoq, Siumullu aalisarnermut oqaaseqartuata Karl-Kristian Krusep suliniaqatigiiffik eqqunngitsumik saqqummiussisaqattaarnerarlugulu inuiaqatigiinnut mitalliinerarpaa.
Uumassusilinnik ilisimatuut 2013-imiit 2015-imut innersuutaat sinnerlugit qilalukkanik qernertanik aarrinillu pisaqartoqartoq, WWF-ip oqaatigaa.
- Kalaallit Nunaanni piniakkanik aqutsinerup ukiuni makkunani allanngornera ajoraluartumik takusinnaavarput. Piujuaannartitsinissaq tunngaviginagu piniartoqarnera uumasoqassutsimut takornariartitsisullu tammajuitsussanik tuniniaanissaannut ajoqutaaginnarani aamma Kalaallit Nunaata isigineqarneranik innarliivoq.
Aamma atuaruk WWF: Qilalukkat qernertat aarrillu piujuaannartitsinissaq tunngaviginagu piniagaapput
Kaare Winther Hansen, WWF-ip Nuummi immikkoortortaqarfianeersoq, taama allappoq.
Naalakkersuisut tusagassiuutinut nalunaarumminni akipput, uumassusilinnik ilisimatuut innersuutaat namminneq malikkitik. WWF-ilu sattalluni oqaluttoq, naalakkersuisoq taamaammat isumaqarpoq.
Pinngortitaleriffiulli kisitsisaataasa takutippaat qilalukkat qernertat pisassiissutigineqartunit innersuussutigineqartunillu amerlanerit pisarineqarsimasut.
Tamannalu tunngavigalugu WWF isornartorsiuivoq.
- Ataatsimut isigalugu Kalaallit Nunaanni qilalukkanik qernertanik piujuaannartitsinissaq tunngavigalugu piniarneq pitsaasumik ingerlanneqanngilaq. Pinngortitaleriffik nalunaarummi aarrit aamma pillugit allappoq.
Taamaakkaluartoq Siumut aalisarnermut oqaaseqartuata Karl-Kristian Krusep WWF-ip pinngortitaleriffiup allaaserisaanik issuaalluni nalunaaruteqarnera inuiaqatigiinnut mitalliinerusutut taavaa.
WWF aalisarnermut naalakkersuisumit qaaqquneqarpoq. Piniakkanik piniagassiisarnermut suleriaatsit agguaasseriaatsillu pillugit nassuiaassisoqarnissaa tassani pilersaarutaasoq, naalakkersuisoq allappoq.
