WWF-ip isornartorsiutaa tusaamaneqalerpoq

Pinngortitaq pillugu nunarsuaq tamakkerlugu suliniaqatigiiffiup WWF –ip Namminersornerullutik Oqartussat nunatsinni nannunniartarnermik aqutsinerannik isornartorsiuinera nunani allani isiginiarneqalersoq, nutaarsiassaqartitsivik Reuters tusarliussivoq.

Nutaarsiassaqartitsiviup Reutersip qarasaasiakkut nittartagaa nunanit tamalaanit nutaarsiassatigut atorluarneqartuuvoq, nittartakkamilu issittumi uumasut; Nannut, aarrit, qilalukkallu nunatsinni piniarneqartarnerat oqaluttuarineqarpoq. Allaaserisami nannut aarrillu killilersugaanngitsumik piniagaasarnerannut WWF-ip isorinninnera issuarneqarsimavoq.

Nunat tamalaat pinngortitamik uumasunillu illersuiniarnerminni piumasaqaataannik nunatta malinnaaniarnissaanut akisussaaqataangaluarluni Danmark akisussaaffimminik qimarratiginninnerarlugu Pinngortitaq pillugu nunarsuaq tamakkerlugu suliniaqatigiiffik aamma isornartorsiuivoq.