Naalakkersuisut issittumi imaatigut angalannermi nunarsuarmi tamarmi umiarsuit ikummatissaanni mingutsitsinerpaamik uuliamik kinertumik atugaqarnissaata inerteqqutigineqalernissaa sapaatip-akunnerata siuliani akuersissutigaat. Toqqorsivimmit assiAssi: Kåre Press-Kristensen

WWF HFO pillugu: - Uagut Issittumi pinngortitamut qanoq pitsaatigerusunnerluta nammineq aalajangertussaavarput

Pinngortitaq pillugu nunarsuaq tamakkerlugu suliniaqatigiiffiup umiarsuarsuit issittup imartaani uuliamik kinertumik atugaqarlutik angalanissaata inerteqqutigineqalernissaa nuannaarutigaa.

Uuliap kingortup (HFO) nunarsuarmi mingutsitsinerpaatut aamma ilisimaneqartup Issittumi inerteqqutigineqalernissaa piffissanngorpoq.

Pinngortitaq pillugu nunarsuaq tamakkerlugu suliniaqatigiiffiup Nuummi suliniuteqarnermi ataqatigiissaarisua, Kaare Winther Hansen isumaqarpoq.

- Suliamut atatillugu pisoqarnera nuannaarutigingaarparput. Naammagittaangaatsiarnikuuvugut, taanna KNR-imut oqarpoq.

Naalakkersuisut issittumi imaatigut angalannermi nunarsuarmi tamarmi umiarsuit ikummatissaanni mingutsitsinerpaamik uuliamik kinertumik atugaqarnissaata inerteqqutigineqalernissaa sapaatip-akunnerata siuliani akuersissutigaat.

Polarkode suua? 
 

Polarkode nunat tamalaat akornanni malittarisassaavoq, umiarsuarnut Issittumi angalasunut pissutsinut pitsaanerusumik sakkussaqartitsinissamut ilaatigut qulakkeerisussaq.

 

Umiarsuit sikoqarluartumi angalasinnaanissamut sanaartugaassapput, sillimaniarnissamullu atortorissaarutinik pisariaqartunik useqassallutik.

HFO-mik inerteqquteqarneq Naalagaaffiit Peqatigiit imarsiornermi suliniaqatigiiffianit, International Marine Organisationimit 2021-mit atuutilerneqarnissaa naatsorsuutigineqarpoq.

Piffissaliussat isornartorsiorai

Inerteqquteqarneq umiarsuarnut amerlanerpaanut 2024-mi juulip ulluisa aallaqqaataani atuutilissaaq, angallatinulli polarkodemik malinnittunut inerteqquteqarneq aatsaat 2029-mi juulip ulluisa aallaqqaataannit atuutilissalluni.

Piffissaliussallu taakku Pinngortitaq pillugu nunarsuaq tamakkerlugu suliniaqatigiiffiup isornartorsiorpai.

- Isumaqarpugut piaarnerpaamik iliuuseqartoqassasoq, taamaalilluta issittumi pinngortitamik mianerinnissinnaassalluta. Taamaammat naalakkersuisut 2024 ulloq aallarteqqiffiussasutut oqaatigissagaat neriuutigaarput, aamma naak 2029 tikillugu sivitsuisoqarsinnaagaluartoq, Kaare Winther Hansen oqarpoq, taassumalu Royal Arctic Linep uuliamik kinertumik ikummatissaqartarnera erseqqissaatigaa.

- Umiarsuit taakku piaartumik allanngortinneqarnissaat kaammattuutigiinnarsinnaavarput, taamaalilluta HFO-p nunatta imartaani piaartumik atorunnaarsissallutigu.

Uumasoqarneq ernummatigigaa

Uuliakoortoqarneranimi kingunerluutit ajunaarnersuussasut, Kaare Winther Hansen nassuiaavoq:

- Issittup imartaani pingaartumik nunatta avannaani umiarsuarmik ajutoortoqaraluaruni uuliamik kinertorujussuarmik HFO-mik imaaniittoqalissaaq. Taannalu imaani sikoqartillugu salikkuminaalluni, taamaalillunilu imaani timmissanut, miluumasunut – immaqalu aalisakkanik raajanillu avammut nioqquteqarnitsinnut kingunerluuteqarujussuassalluni, taamaattoqarpammi ukiorpassuarni mingutsitsisoqassaaq, Kaare Winther Hansen oqarpoq, nangillunilu:

Inunnut aarlerinaateqarnera naatsumik:

Inuit uuliap pujoralaanik ajoqusiisartunik najuussuineranni kræftimik, uummatit taqarsuini nappaatinik, milittoornermik, astmamik, bronkitisimik aammalu pujortartanngitsut pujortartarnermi puaat qerattarnerinik nappaateqalersinnaanerat annertusisarpoq.

Tigusiffik: Naalakkersuisut

- Issittumi pinngortitamut qanoq pitsaatigerusunnerluta nammineq aalajangertussaavarput.

Kilisaatit uuliamik kinertumik atuinngitsut

Sulisitsisut oqarnerat naapertorlugu nunatsinni Royal Arctic Line kisiartaalluni HFO-mik suli ikummatissaqarpoq. Kilisaatit HFO-mik ikummatissaqarunnaarnikuupput.

Royal Arctic Linep inerteqquteqarnissaq taperseraa HFO-millu atuiunnaarnissamut ikaarsaariartortoqarluarnissaa naatsorsuutigigaa, Royal Arctic Linep pisortaa, Verner Hammeken KNR-imut allappoq.

KNR-ip Polaroilip pisortaa, Githa Brask Olsen aamma attaveqarfigaa. Taassuma Polarolip HFO-mik tunisisarneq aasaq manna unitsikkaa oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat