ASSIT WWF aamma National Geographic suleqatigiillutik paasititsiniaalersut
Sumiiffik pineqartoq nunatta kitaata qeqertallu Canadap avannarpasinnerusuaniittut avannaatungaaniippoq. Sikut allanngorarnerinik takussutissat takutippaat imaata sikua sumiiffimmi tassaniittoq silap pissusiata allanngoriartorneranut aasaanerani sivisunerpaamik akiuussinnaasoq.
Uuttortaanerillu takutippaat imaata sikua aasaanerani ukiut qulikkuutaarlugit 12 procentinik annikinnerulersartoq. Taamaattoqarneralu ingerlaannassappat, aasaanerani imaata sikua kinguaariit ingerlanerini nungorartarsinnaavoq, Pinngortitaq pillugu nunarsuaq tamakkerlugu suliniaqatigiiffik tusagassiorfinnut nalunaaruteqarluni taama allappoq.
- Last Ice Area nunarsuarmi pissutsinut tunngatillugu sumiiffiuvoq pingaarutilik. Uumasut, soorlu qilalukkat qernertat, aarrit nannullu imaata sikua pisariaqartilluinnarpaat, qasuersaarfissatut, nerisassarsiorfissatut kinguaassiorfissatullu, WWF-ip oqaaseqartartua Clive Tesar taama oqarpoq.
WWF aamma National Geographic suleqatigiillutik ilaatigut Qaanaami inuuneq pillugu filmimik piviusulersaarusiorniarput.
Filmi taanna suliniutip "Pristine Seas"-ip ilagaa - tassalu immat sunnerneqanngitsut - National Geographicimeersullu Qaanaamiissimapput, taavani uumasunik aammalu naggueqatigiit Inuit ulluinnarni inuunerat ileqqutoqqallu sammillugit filmiliorsimallutik.
Filmiliortut aamma Canadap avannaani Qeqertaalummi paasisassarsiorlutik angalasimapput.
Issittup imaata sikuata aakkiartornera qanoq-issasorineqartoq pillugu videoliaq ataani takuneqarsinnaavoq:
