Inuit 55.000-it illoqarfiup ammarnernerani ulloq siulleq qimuttuitsorlutik illoqarfik qimakkaat oqartussat ilimagaat.Assi: Hector Retamal/AFP/Ritzau Scanpix

Wuhanimi inuit tusintilikkuutaat qaammatialunni mattussaaqqareerlutik aallarartut

Wuhanimi inuppassuit ulluni 77-ini angerlarsimareerlutik unnuaq unnuap qeqqaniit anisinnaanngorput.

Wuhanimi illoqarfik qaammatit marluk sinnerlugit matoqqareersorlu inuit angerlarsimaffimminnit anisinnaanngorput.

Kinami illoqarfissuaq unnuaq unnuap qeqqanut ammarmat inuit tuusintilikkuutaat qimuttuitsorlutik illoqarfik qimannialerpaat.

Inuit 55.000-it illoqarfiup ammarnernerani ulloq siulleq qimuttuitsorlutik illoqarfik qimakkaat oqartussat ilimagaat.

- Ulluni 77-ini mattussaaqqavunga! Ulluni 77-ini mattussaaqqavunga!, angut illoqarfimmut najugarisaminut Hunanimut aallarniarluni qimuttuitsoqarfimmiittoq nillialluni taama oqarpoq.

Wuhan coronavirusimik tunillaassuutileqqaarfiusoq jannuaarip ulluisa 23-annili matoqqavoq, inuillu angerlarsimaffimminni mattussaaqqasimallutik.

AAMMA ATUARUK Hubei corona pillugu matoqqareerluni ammaqqittoq

Wuhan coronavirusimik siaruatsaaliiniarluni nunarsuarmi siullersaajulluni sakkortuunik killilersuiffiuvoq.

Wuhanip ilaani Hubeimi tamarmi kingusinnerusukkut killilersuisoqalerpoq.

Kinami oqartussat malittarisassanik sapaatit akunneri marluk matuma siorna qasukkaapput, inuppassuillu qaammatini marlunni angerlarsimareerlutik aniapput.

Kinami coronavirusimut atatillugu marlunngormat toqusoqarsimanngitsoq oqartussat jannuaarimili aatsaat nalunaarutigaat. Kinap ilaani Hubeimi inuit katillugit 3212-it coronavirusimut atatillugu toqquteqarput.

Kinamili oqartussat toqusunik tunillatsittunillu nalunaarsueriaasiat arlaleriarluni apeqquserneqartareerpoq.

Wuhanimi akornuserneqarani angalasinnaatitaanermut malittarisassat qasukkarneqareeraluartut aamma illoqarfimmiit tassannga illoqarfimmullu tassunga angallanneq ammareeraluartoq malittarisassaqartitsinikkut killilersuineq suli atuuppoq.

Isummersuutit