WTO-p aalajangiineranut Canadamiut qisuariaataat allat

Nunarsuarmi niueqatigiit kattuffissuata WTO-p EU-p puisit amiinik eqqusseqqusinngerminik atuutsitsiinnarsinnaaneranik aalajangiineranut Canadamiut qisuariarfigeqqippaat. Taamatut mattussisoqarnera immikkut ittumik naggueqatigiinnut Inunnut aalajangersaasoqarneratigut Nunatsinnut atuutsinneqanngilaq.
Allattoq Marianne Stenbæk, Montreal, Canada, Simon Uldum
novembarip 27-at 2013 05:40

Canadami naalakkersuisut taamatut aalajangiisoqarnera ullut 60-it tullinnguuttut iluanni suliassanngorteqqinniarlugu nalunaaruteqareerput.

Canadamiut aalisarnermut ministeriat Gail Shea avatangiisinullu ministeriat Leona Aglukkaq ataatsimut oqaaseqaateqarlutik erseqqissaatigaat puisinniarneq naalliutsitsinertaqanngitsumik, piujuaannartitsinissamik tunngaveqartumik sukumiisumillu aqunneqartumik ingerlanneqarnera Canadap aalajangiusimagaa. Peqatigitillugu aamma erseqqissaatigaat akerlerluinnaanik isummersuutit tamarmik oqaluttuarineqartartunik paasissutissanillu eqqunngitsunik tunngaveqartut.

- Taamatut aalajangiisoqarsimanera Nunarsuarmi niueqatigiit kattuffissuanni ilaasortaasut tamarmik ernumanartutut isigisariaqaraat, ministerit ilaatigut aamma oqaatigaat.

WTO-p aalajangiinera "ileqqorissaarnissamik" tunngaveqartinneqarpoq, Canadamili puisinniat kattuffiata siuttuata Dion Dakinsip apeqqutigaa taamatut aalajangiisoqarneratigut aamma kukkukuuaqqanik, puulukinik nersussuarnillu toqoraasarneq ileqqorissaarnissamik tunngaveqartumik aamma unitsinneqassanersoq. Taannami isumaqarpoq aalajangiineq naatsorsuutiginngisanik arlalinnik kinguneqarsinnaasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq