Wozniacki Australian Openimi finalimut annguttoq
Qallunaaq tennisertartoq Caroline Wozniacki tenniserluni unammersuarnerni Australian Openimi finalimut unnuaq annguppoq.
Allattoq Karsten Sommer
januaarip 25-at 2018 07:06
Nutserisoq Mads Lynge
Wozniacki semifinalertoqarnerani Belgiamiumut Elise Mertensimut unammigami 6-3 7-6-imik ajugaavoq. Mertens nunarsuarmi arnani tennisertartuni normu 37-uvoq, Wozniackilu normu 2-julluni.
Australian Open unammersuarnernut annernut Grand Slaminut sisamanut ilaavoq, Caroline Wozniackilu pingajussaa Grand Slamimi finalimut annguppoq, USA-mi unammersuarnerni US Openimi finalimut marloriarluni siusinnerusukkut anngunnikuulluni.
Arnat Australian Openimi nunatta nalunaaqutaa naapertorlugu arfininngornermi ullaassakkut finalissapput, Wozniackillu unammisassaa tassaavoq Simona Halep, Rumaaniameersoq. Taassuma semifinalernermini Angelique Kerber, Tysklandimeersoq, ajugaaffigaa.
