Witness Blanket, tippi takussutissiisoq
Indianerit eqqumiitsuliortut inuusuttut British Columbiameersut suleqatigiillutik tippimik iigarmiumik angisuumik pilersitsiniarlutik aalajangersimapput, tassani oqaluttuarineqassallutik atuarfiit ineqarfiutigisut akuerineqarsinnaanngitsut aamma meeqqat misileraatitut atorneqartarsimanerat. Salish indianeri Carey Newman tamatuminnga suliniuteqartuuvoq.
Eqqumiitsuliortut atuarfinni ineqarfiutigisuni namminneerlutik najugaqarsimanngillat, angajoqqaamilli ilaquttamillu oqaluttuaat ilisimannittutullu nassuiaataat tusartarsimallugit.
Suliariniagartik aallaavigalugu maanna Canadami angalapput, atuarfiillu najugaqarfiutigisut pillugit Ilumoortussaq saammaateqatigiinnissarlu pillugit isumalioqatigiissitami tusarniaanerni ilisimannittut ilaannik oqaloqateqassallutik. Tamatumunngalu peqatigitillugu taamanikkumut tunngasunik eqqaamannissutaasinnaasunik katersissallutik.
Ilisimannittut eqqumiitsuliortunit kajumissaarneqarput, atuarfinnut najugaqarfiutigisunut qanorlu pineqartarnerminnut eqqaassutaasinnaasunik tunissuteqaqqullugit... Taamaalilluni arlallit nutsaminnik kipiseriarlutik tunniussipput, tamatumani meeqqat indianererpalaarpallaannginniassammata imaluunniit naggueqatigiittut Inuttut isikkoqannginniassammata nujaarutivillugit nujaajarneqartarnerat eqqaamaneqarniassammat .. tamannalu meeqqat ilarpassuisa kingunerlutsittarpaat.
Ilaat meeqqap kamippaanik imaluunniit atisaminermik ipertuumik meeqqap tammaaneqartup imaluunniit qimaariaraluartup pigisaanik tunniussipput... allap meeqqat atuagaat Inuktitut allannilik tunniuppaa. Carey Newmanip siunertaraa pigisanik katillugit 2.500-nik katersinissaq, tamakkulu indianerit aamma naggueqatigiit Inuit tarnimikkut pinertussusiannut ilisarnaataassapput
Eqqaamassutissatut katersorneqartut tippimut iigarmiumut mersuunneqassapput... taanna tassaassaaq aliasunnerup tippia, taamaattorli aamma tassaassalluni tippi neriuummik nutaamik ersersitsisoq aamma kulturitoqqap oqaatsillu pigiinnarnissaannut piumassuseqalersitsisoq.
Tippi iigarmiu taaguuserneqassaaq - Tippi takussutissiisoq - taassumalu 2 meterinik portussuseqarnissaa 9 meterinillu takissuseqarnissaa naatsorsuutigineqarpoq, aappaagulu naammassineqariarpat Canadami illoqarfinni assigiinngitsorpassuarni saqqummersinneqassalluni.
