Winter Cities Conference Nuummi piareersarneqalerpoq

Allattoq Mads Lynge
juulip 23-at 2006 16:15

Sapaatip akunnerata tulliani illoqarfiit ukiuusartut, Winter Cities-inik taaneqartartut, ataatsimeersuarnissaat piareersarlugu Nuummi ataatsimeeqatigiittoqassaaq.

Ataatsimeersuarnivittaa 2008-mi Nuummi pisussaavoq, inuillu 300-t missaat peqataassapput.

- Atorfillit 35-t marlunngorpamiit ataatsimiilissapput, ataatsimeersuarnissaq eqqartorlugulu piareersassagamikku, Nuup Kommuneata paasissutissiisartua Jens Hansen taama ilisimatitsivoq. Ataatsimiinneq sisamanngornerup tungaanut ingerlanneqassaaq.

World Winter Cities Association for Mayors tassaavoq illoqarfiit ukiuusartut peqatigiiffiat.

Marlunngorpat ataatsimiittoqalerpat Kinami illoqarfiit Changchun, Harbin, Tsitsihar aamma Shenyang peqataatitaqassapput, Estlandiminngaanniit Maardu, Japanimiit Sapporo, Korea Kujallermiit Taebaek, Litauiminngaanniit Kaunas, Alaskaminngaanniit Anchorage, kiisalu Norgeminngaanneersut Tromsø, Hammarsfest aamma Longyearbyen peqataatitaqassallutik.

Katuami ataatsimiittoqassaaq, peqatigiiffiullu avatangiisinut ataatsimiititaliaata, peqatigiiffiullu Europap kippasissortaani immikkoortortaqarfia ataatsimiinnerup nalaani naapinniarput.