Qarasaasialiorfissuup Microsoftip programiliaa, Windows, immikkut ittumik inuktitut qaammatip tulliani saqqummissasoq, Nunatsiaq News ullumi allappoq.
Programmip Windowsip inuktitut oqaasertalersornerata kingunerisaanik, qarasaasiap atortuisa amerlanersai inuktitut allanneqassapput.
Windowsip oqaasertai ukiup affaata missaani inuktitut oqaasertalersorneqarpoq. Iqalunni oqaatsinik kulturimillu qitiusoqarfik inuktitut oqaasertalersuisuuvoq. Tassanngaaniillu Windowsip atulerneqarnissaa pissanngatigineqarpoq:
- Siornagut taama misiliisoqarsimanngilaq, neriuppungali innuttaasut qarasaasiamik atuinissaannut kajumilersitsisinnaassasoq, Iqalunni oqaatsinik kulturimillu qitiusoqarfimmi pisortaq Gavin Nesbitt oqarpoq.
Windows programmi inuktitut allagartalik Nunavummi naalakkersuisunit atuarfeqarfinnillu atorneqarumaartoq Gavin Nesbitt aamma neriuppoq. Windows inuktitut allagartalik massakkorpiaq naalagaaffimmi atorfilittanit misiligarneqarpoq.