William Heinesen katersugaasivittaartilerpaat

Savalimmiormiu atuakkiortoq tusaamasarsuaq, nunatsinni aamma nalunnginneqarluartoq, William Heinesen, inunngorfimmini, Tórshavnimi, katersugaasiviliuunneqalerpoq.

Tórshavn aamma tassaavoq Heinesenip atuakkiaani amerlanerni eqqartorneqartartoq.

Tórshavnimi illoqarfiup pisortaasa qinikkat, tassa byrådit, qangali pilersaarusiaq akuersissutigeqqammerpaat, William Heinesenip, nuliatalu aamma toqoreersup, Lisa-p, illu angerlarsimaffigisimasaat kommunip pisiarissagaa katersugaasiviliaralugulu.

William Heinesen nulialu Lisa namminneq illumik saniatigut allamik aamma illuaraateqarsimapput, William Heinesenillu taalliani atuakkianilu amerlanerit tassani allattarsimavai. William Heinesen 90-inik ukioqarluni 1991-mi toquvoq.

Danskit aningaasaateqarfiat Velux, nuliariit angerlarsimaffiata pisiarineqarnerani aamma aningaasaleeqataavoq.

Piumasaqaatinut ilaavoq, William Heineseniugaluaq Tórshavnip Kommuneata aningaasateqarfiliuutissagaa, taamaalilluni illorisimasaat iluarsartuunneqarsinnaalissammat, katersugaasivittaallu ukiuni tulliuttuni qulini qularnaatsumik ingerlasinnaanissaa qulakkerneqarsinnaanngussalluni.

Illup iluarsartuunneqarnissaa 1 millioni koruunit missaannik akeqassangatinneqarpoq.

Katersugaasivik qaammatit arlaqanngitsunnguit qaangiuppata takusarneqarsinnaalissaaq.