Wikke Rasmussenilu: Kalaallit Nunaanni arnani pinnernerpaajugunarpoq
Aallakaatitassiamik aaqqissuisut oqaloqatigaavut, Juullimut inuulluaqqussitinik assigiinngitsunik taakku immiussisimapput, toqqaannartumillu aallakaatitsinerup nalaani taakku takutinneqarumaarlutik. Aaqqissueqataasoq Michael Wikke taama oqarpoq:
"Kalaallit Nunaannut Juullimut Inuulluaqqusineq"-mik aallakaatitsinerup nalaani pisartut amerlanersaat ukiut tamaasa ilaatinneqartarput. Juullimut inuulluaqqusinerit tamani tamaneersut DR-ip tusagassiortuisa, aliikkusersuisartut Steen Rasmussen Michael Wikkelu peqatigalugit immiussimavaat. Taakku DR-ip Juullimut Ammartagaa, Julestjerner, siorna aallakaatinneqartoq suliaraat.
Juullimut inuulluaqqussutit illoqarfinni marlunni nunaqarfimmilu ataatsimi immiunneqarput, immiussinissarlu siunertaralugu angalaneq Kangerlussuup eqqaani Sermersuarmit aallartimmat misigisassat amerlaqaat:
- Nuanneqaaq. Tuttut, umimmaat uumasullu allat takuavut. Ippassarlu Sisimiuniikkatta qimusserpugut, silageqalunilu, nuannisaqaagullu. Sara Berthelsen qimussertoraarput, aatsaallu taama pikkoritsigisumik qimussertoqarpugut, Wikke Rasmussenilu ataatsimut oqarput.
Kangerlussuup eqqaani Sermersuarmit qimusserlutik Sisimiunukariarlutik, Nunatsinni angalanertik Nuummi naggaserpaat.
- Nuummut ullumi tikippugut, Lisbeth Poulsenilu Juullip nipitittagaanik titartaasoq pulaarlutigu. Taakanngaanniit aatsaat anivugut, Kalaallillu Nunaanni arnani pinnernersaasoq immaqa oqartoqarsinnaavoq, tikeraat oqarput.
Isiginnaartitsisartunngorniat aamma pulaarneqarput, Sisimiormiuaqqallu peqatigalugit immiussisimanertik Steen Rasmussenip puigornavianngilaa:
- 1.klassimi atuartut 20-t kalaallisoorlutik Juullimi inuulluaqqusisut aqqi ilisimanngilakka, misigisarli nuanneqaaq. Massakkorpiaq nuannaaqaanga, Kalaallit Nunaata juullerpalaartarnera Nunarsuarmi assissaqarunanngilaq, tikeraat oqarput.
"Kalaallit Nunaannut Juullimut Inuulluaqqusineq"-rmut tassa qilanaartoqarsinnaavoq, radiokkummi isiginnaarutitigullu ataatsikkut - toqqaannartumillu - Juulliaqqamut aqaguttoq aallakaatinneqarumaarmat.
Erinarsortartoq Julie Berthelsen aallakaatitsinermik ukioq manna aqutsisuussaaq, DR-illu nipilersortartoqatigiivi DR Big Bandet, erinarsoqatigiit Aavaat tusarnaartitseqatigissavaat, soorlu aamma Nukâka Coster Waldau, Karina møller, Aviaja Lumholt, Sinne Eeg kiisalu Mads Mathias tusarnaartitsissasut.
"Kalaallit Nunaannut Juullimut inuulluaqqusineq" Danmarkip Radioatigut 1932-imili aallakaatinneqartarsimavoq, aliikkutassiani suli aallakaatinneqartartuni sivisunerpaamik atasimasutut oqaatigineqartarluni, ukiunimi 81-ini ukiumoortumik aallakaatinneqartarami.
"Kalaallit Nunaannut Juullimut inuulluaqqusineq" aqagu Juulliaqqamut aqaguppat pisarneq malillugu DR-ikkut ualiartoq nalunaaqutaq arfinermut qiteqquppat, tassa Nunatta nalunaaqutaa malillugu marlunut qiteqquppat aallakaatinneqarumaarpoq. Aamma KNR-ikkut Juullerujussuup aappaani, 26-ianni, unnukkut nal. 20.00 aallakaatissavarput.
