WHO naapertorlugu inuit puamikkut nappaatillit coronavirusimik tunillatsissagaluarunik perululernissamut qaninnerujussuusarput. Toqqorsivimmit assi.Assi: Flickr Creative Commons

WHO: Pujortartartut coronaviruseqalersimasut perululernissamut qaninnerugunarput

Nunatsinni innuuttaasut affaat sinnerlutik pujortartartut, innuttaasut peqqissusaannik misissuisitsinermi kingullermi erserpoq. Pujortartartut coronaviruseqalersimasut perululernissamut qaninnerugunarput.

Tunillaattartunik naappaateqaleratarsinnaaneq, puakkut nappaateqalernissamut ilimanaateqarneruneq puallunnerlu.

Tamakku pujortartartut coronaviruseqalersimasut pujortarneq ajortunut sanilliullutik perululernissamut qaninnerugunarnerannut pissutaasinnaasunut ilaapput.

Peqqissutsimut Naalakkersuisoqarfik KNR-imut allakkatigut akissummini taama allappoq. Ilaatigut Nunat tamalaat peqqissutsimut suleqatigiiffiata WHO-p ilisimatusaataa tunngavigaa.

Nunatsinni pujortartartut

Nunatsinni innuttaasut 52 procentii 2018-imi ullut tamaasa pujortartarput.

Nunatsinni pujortartartut amerlagaluaqisut ukiut qulikkuutaat kingulliit ingerlaneranni ikiliartorput.

Nunatsinni innuttaasut 68 procentii 1993-imi ullut tamaasa pujportartarput.

Nunatsinnili innuttaasut affaasa pujortartarnerat peqqinnissaqarfiup pisinnaassusaanut iliuuseqarsinnaassusaanullu qanoq sunniuteqarumaarsinnaanersoq, peqqissutsimut oqartussat erseqqissumik akisinnaanngilaat. 

- Coronavirusi nunatsinni qanoq tunillaassuutsiginersoq peqqinnissaqarfimmi unammillernartoqalersinnaaneranut apeqqutaasorujussuusoq, naalakkersuisoqarfik allappoq.

Nunatsinni innuttaasut affaat sinnerlutik pujortartartut

Nunatsinni innuttaasut affaat sinnerlutik ullut tamaasa pujortartartut, Statens Institut for Folkesundhedip innuttaasut peqqissusaannik 2018-imi misissuinerani kingullermi erserpoq. 

Nunat tamalaat peqqissutsimut suleqatigiiffiat WHO naapertorlugu coronavirusip inunnit ataasiakkaanit qanoq peruluutigineqarsinnaatiginera pujortartarnermut attuumassuteqartoq, Peqqissutsimut Naalakkersuisoqarfik ilisimatitsivoq.

AAMMA ATUARUK Landslægen om corona: Grønland er i en ret unik situation

Tamanna pujortartarnerup timip akiuussutissaanik innarliisarneranik, tamatumalu kingunerisaanik timip tunillatsinnissamut nappaatinullu allanut akiuussutissakinnerulersarneranik pissuteqarpoq.

Tamatuma saniatigut pujortartartut coronaviruseqalersimasut ataatsimut isigalugit perululernissamut qaninnerusartut ilimagineqarpoq. Inuimmi puamikkut nappaateqareesut pualloreersulluunniit coronavirusimik tunillatsissagaluarpata perululernissamut ilimanaateqarnerulersarmata.

Pujortarunnaarnissaq innersuussutigigaa

Pujortartartut coronavirusimik tunillatsissimanertik pissutigalugu perululersinnaasut WHO-p nunatsinnilu peqqissutsimut oqartussat nalileraluaraat, ilisimatusaat paasissutissanik amerlanngitsunik tunngaveqarpoq.

Pujortartarnermi coronaviruseqarnermut qanoq ersiuteqalersitsigisarnersoq coronaviruseqalernissamullu qanoq qaninnerulersitsitigisarnersoq ilisimatusaatigineqarpiarnikuunngilaq. 

Taamaattumik pujortartartut coronavirusimik tunillatsissimasut qanoq perululersinnaatiginersut erseqqissumik oqaatigineqarsinnaanngikkallarpoq.

Peqqinnerulerusukkaannili pujortartarunnaarnissaq isumatusaarnerussasoq, Peqqissutsimut Naalakkersuisoqarfik allappoq.

Tamanna timip akiuussutissaata patajaannerulerneranik kinguneqarlunilu pujortortartarnermit assigiinngitsunik nappaateqalernissamik pinngitsoortitsisinnaavoq.

Isummersuutit