WHO-p aalajangiinera apeqquserneqarpoq
Taamaattumik nualluutip akiorniarneqarnissaanut WHO-p aalajangiinera nakorsat arlaqartut sakkortuumik nalorninartoqartippaat. Danskit peqqissutsimut aqutsisoqarfiata paasinarnerusumik ingerlatsisoqarnissaa ujartorpaa.
Juunip aqqarnat nakorsaasiorfinnut ulloq nuannersuuvoq, ullormi taanna nualluut H1N1 tuniluuttuusoq WHO-mit pisortatigoortumik nalunaarutigineqarpoq, tamatumalu nassatarisaanik Danmark akiuussutissamik pisinissaminut pisussaaffeqalerpoq. Nakorsalli WHO-mik siunnersuisartut ilaat, pappiaqqatigut takussutissartaqanngikkaluartumik nakorsaasiorfinnit akissarsiaqartarput, nakorsaasiorfiillu tamatuma malitsigisaannik akiuussutissamit milliardilikkaanik iluanaaruteqarput.
Peter Gøtzsche, ilisimatusarnikkut attaveqaammi kikkunnulluunniit attuumassuteqanngitsumi Cochranemi pisortaq mamiasuppoq.
Suliffeqarfinnik akissarsianik tunniussisartunik siunnersuinermik iluaqutiginnissinnaasunik sumulluunniit attuumassuteqanngitsumik siunnersuisutut inissisimasoqarsinnaanngitsoq, ilisimatusarnerit amerlasuut takussusernikuuaat.
Immikkut ilisimasallit nakorsaasiorfinniit aningaasatigut iluanaaruteqarnermik saniatigut WHO-mik siunnersuisinnaasarnerat Peqqissutsimut aqutsisoqarfimmi pinaveersaartitsinermut aqutsisup Else Smithip tupaallaatiginngilaa, taakkumi tassaagajupput sulianut ilisimasaqarnerpaasartut.
Danmarki qiviarutsigu, immikkut ilisimasallit siunnersortigisinnaasagut ikittunnguupput, suliassaqarfinnilu allani aamma akiuussutissamut tunngasuni taama inissisimavugut. Taamaammat siunnersorneqarnissap eqqumaffiginissaa pingaaruteqarpoq, aalajangiisoqartussanngorpallu ilunaaruteqarnissamik soqutigisaqartut pinatik inuit allat taamaaliortariaqarput.
Taamaammat immikkut ilisimasallit oqartussaasunik siunnersuinissamik akuersissuteqarfigineqarsimasut, kikkunnik sullissinerlutik paasinarnerusumik saqqummiuttalertariaqaraat Else Smith-ip kaammattuutigaa.
Sumulluunniit attuumassuteqannginnermi, paasinartumik saqqummiussisarnissaq ileqqorissaarneruvoq aamma WHO-mut tunngatillugu. Uangalu EU-mi suleqatigiinnernut ilaagama aamma oqartoqarsinnaavoq immikkut soqutigisaqartunga, taamaammat tamanna pingaaruteqaqaaq. Suliamullu atatillugu eqqartugassaqaqaaq.
Else Smith Arne Skadhede-mut ilanngutassiisumut taama oqarpoq. Nunatsinni maannamut ataasiinnaq H1N1-imik nualluuteqareerpoq taannalu niviarsiaraavoq Tasiilameersoq, maannalu taanna ajorunnaareerpoq. Nunarput tunillatsinnissaminnut qanittut akiuussutissamik pisinikuuvoq taannalu sinerissamut nassiussuunneqareersoq, Peqqinnissaqarfinnik Nakkutilliisoqarfik ilisimatitsivoq. Akiuussutissamik kapuuinerit tamarmiusut 2010-mi januarip aallaqqaataa nallertinnagu naammassereernissaat, Peqqinnissaqarfinnik nakkutilliisup Flemming Stenzip anguniarnerarpaa.
