Inuit 260.000-t missaat akunnerit 24-t ingerlaneranni tunillatsissimasut WHO-p nalunaarutigaa
Nunarsuarmi inuit coronavirusimik akunnerit 24-t kingulliit ingerlaneranni tunillanneqarsimasut aatsaat taama amerlatigisut, Naalagaaffiit Peqatigiit peqqissuunissaq pillugu suleqatigiiffiata WHO-p nalunaarutigaa.
Inuit coronavirusimik nunarsuaq tamakkerlugu akunnerit 24-t kingulliit ingerlaneranni tunillanneqarsimasut 259.848-sut WHO-p ilisimatitsissutigaa.
Ullut aappassaat rekordiliisoqartoq WHO oqarpoq.
Coronavirusimik tunillanneqarsimasut USA-mi, Brasiliami, Indiami Sydafrikamilu amerliartornerpaapput.
Inuit 7360-it coronavirusimik nunarsuaq tamakkerlugu akunnerit 24-t kingulliit ingerlaneranni toqquteqarput, maajip ulluisa qulingannili aatsaat taama amerlatigalutik, WHO-p ullormut nalunaarsuisarnerani tamanna takuneqarsinnaavoq.
Coronavirusimik nunarsuaq tamakkerlugu tunillanneqarsimasut sisamararterutaasa missaat USA-mi tunillanneqarsimapput.
Brasiliami tunilanneqarsimasut amerlassutsimikkut tulliupput, tamaani 2 millionit sinnerlugit tunillannneqarsimasut sisamanngormat nalunaarutigineqarmat.
Indiami, 1,4 milliardinik innuttaqartumi, coronavirusimik tunillanneqarsimasut 1 millionit sinneraat tallimannngormat nalunaarutigineqarpoq.