Tedros Adhanom Ghebreyesusip inuit illersorniarlugit nunani tamalaani killilersuinerit aatsaat malinneqarpata coronavirus ajugaaffigineqarsinnaasoq oqaatigaa, matumanilu qanermut assiaqutserlunilu inuit katersuuffigisaannukarnaveersaarnerit pingaarnertut taallugit.Assi: Baz Ratner/Reuters/Ritzau Scanpix

WHO: Coronavirus nunarsuarmi tuniluussimasunit allanit sakkortunerpaavoq

WHO peqqissutsikkut ajornartoortitsisunik nunarsuarmi tuniluuttoqarnera arfinileriarluni taanikuuvaa. Taakkunannga coronamik tuniluuttoqarnera sakkortunerpaavoq.

Coronap nunarsuarmi tuniluunnera peqqissutsikkut nunarsuarmut tamarmut siaruaassimasumik aatsaat taama ajortigisumik nappaalasoqartoq, Naalagaaffiit Peqatigiit peqqissuunissaq pillugu suleqatigiiffiata WHO-p qullersaata Tedros Adhanom Ghebreyesusip nalilerpaa.

Ghebreyesus tusagassiortunik Genèvemi katersuutsitsinermi ippassaq ataasinngornermi tamanna oqaatigaa.

Coronap nunarsuarmi tamarmi tuniluutilernera peqqissutsikkut ajornartoortitsineratut ukioq manna januaarip ulluisa 30-anni siullerpaamik taaneqarpoq.

WHO maannamut tallimariaannarluni taamaaliorsimavoq, tassa svineinfluenzamik, poliomik (nukillaarnermik), zikavirusimik kiisalu ebolamik nappaalanerit ajornartoortitsinertut nalilerneqarnikuullutik.

AAMMA ATUARUK Inuit 260.000-t missaat akunnerit 24-t ingerlaneranni tunillatsissimasut WHO-p nalunaarutigaa

Peqqissutsikkut ajornartoortitsinerit akornanni coronavirusip nunarsuarmi tuniluunnera maannamut "sakkortunersaasoq", Tedrosip oqaatigaa.

Tedros Adhanom Ghebreyesusip inuit illersorniarlugit nunani tamalaani killilersuinerit aatsaat malinneqarpata coronavirus ajugaaffigineqarsinnaasoq oqaatigaa, matumanilu qanermut assiaqutserlunilu inuit katersuuffigisaannukarnaveersaarnerit pingaarnertut taallugit.

- Malittarisassat tamakku malinneqarpata aatsaat tunillatsittut ikiliartussapput. Akerlianillu malinneqanngippata tunillatsittut amerliartussallutik, Tedros oqarpoq.

Canadap, Kinap, Tysklandip Korea Kujalliullu coronavirusip siaruatsaaliornissanut iliuuserisaat WHO-p qullersaata aamma nersorpai.

Nunarsuatsinni nunani coronamik tuniluuttoqannginnissaanut angallannermi killilersuinerit killeqarfinnillu matoorinerit piffissamut sivisuumut pinaveersaartitsissutaasinnaanngitsut, WHO-p ajornartoortoqarneranut pisortap, Mike Ryanip ataasinngornermi qarasaasiat atorlugit tusagassiortunik katersortitsinermi oqaatigaa.

- Nunat ataasiakkaat killeqarfimminnik piffissami sivisuumi matoqqatitsinissaat ajornakusuussaaq. Aningaasaqarnerit ammaqqittariaqarput, inuit sulisariaqarput niuernerillu uterteqqinneqartariaqarlutik, Mike Ryan oqarpoq.

Taassuma nutaamik tuniluuttoqaqqinnerani nunat ataasiakkaat matunissaat pisariaqarsinnaasoq nassuerutigaa.

AAMMA ATUARUK WHO: Coronap tunillaassuunnera qaangiuteqqajanngilaq

Tamannali piffissami killiligaallunilu nunap inissisimanerani killiligaanissaa kaammattuutigaa.

- Virusi pillugu ilisimasaqarnerugutta nakrosaasartut nakkutiginninnerusinnaassapput, taanna oqarpoq.

/ritzau/Reuters

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7751
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 24-at 2020 nal. 10:45