Whiskey sermersuarmeersumik imertalik imerneqarsinnaalerpoq
Whiskeyliorfiup, aalartitsilluni akuiaasarfiup, Braunsteinip, whiskeyliani nutaaq, singlemalt whisky, ullumi saqqummiutissavaa. Danmarkip Radioata nittartagaani tamanna atuarneqarsinnaavoq.
- Danmarkimi perngaammik taamaattumik imigassaliortoqarmat whiskey una immikkuullarissuuvoq, Michael Braunstein Nunalerineq Inuussutissallu pillugit atuagassiamut, sapaatip akunneranut ataasiarluni saqqummersartumut, Foodculture-imut, oqarpoq.
Whiskeylu nutaaq taanna ajunngivissimagunarpoq, tassami imigassamik taassumannga naliliillammak, nunarsuarmi pikkorinnerpaat ilaat, Charles McLean, oqarsimavoq Danmarkimi whiskeyliaq nunarsuarmi pitsaanerpaanut ilaassagunartoq.
Whiskey taamaallat ukiuni pingasuni uninngasimavoq, kisianni tassa whiskeymik taaneqarsinnaanngoreerluni. Taamali sivikitsigisumik uninngasimanera naliliisartut pisisartullu apeqqutaatinngilaat, aamma 3.000 koruuneqarnera soqutigigunarnagu, tassami tuniniakkavut nungoreerput, Braunstein nittartakkamini ilisimatitsivoq.
