What’s up Sápmi?

Saamit kalaallillu assigiiffeqarpat? Gíron Same Theaterikkormiut Katuami takutitsineranni apeqqut taanna immaqa akissutissarsineqarsinnaavoq.
Allattoq Elisa Isaksen
maajip 09-at 2011 11:22

What's Up Sápmi? Saamip inuusuttup eqqarsaatai pillugit isiginnaartitsissusiaavoq. Tassani sammineqarput kinaassuseq, oqaatsit, oqaluttuarisaaneq, sungiaassutsit inissisimanerat inuiaassuserlu pillugu paasinnittariaaseq, taama Katuaq paasissutissiivoq.

Apeqqullu unaavoq: Saamiulluni qanoq isumaqarpa? Isiginnaagassiaq Nunatsinni pisimasuulluarsinnaalluarpoq immitsinnulu assiganik aperaluta, kalaaliulluni qanoq isumaqarpa? Katuamit taama nassuiaasoqarpoq.

Inuiaqatitta assiganik ileqqullit pillugit kalaallit isiginnaagassiamik takorusussimasut tusarpara, taamaammat isiginnaagassiaq una qanoq tigussaneraat pissanngatigaara, isiginnaartitseqatigiinnut attaveqaataasoq Susanne Andreassen taama oqarpoq.

Inuunermi apeqqutit pingaarnersaat pillugu kialluunniit paasisinnaasaannik isiginnaartitsisartut takutitsillaqqissuupput, uanilu pingaarutilinnik paasisinnaasatsinnik peqarput, isiginnaagassiaq pillugu ilaatigut taama allaaserisaqarpoq.

Isiginnaagassiaq Nunatsinni maajip 19-ianni takuteqqaarneqassaaq pingasoriarlugulu takutinneqassalluni.