West Ham Islandimiunit pigineqalerpoq

Islandimi naluneqanngitsutut kissartunik puilasoqarpoq, pinngortitaq kusanartorsuulluni erinarsortartorlu tusaamasaq, Björk, aamma islandimiuugilluni. Islandimiut 320.000-iupput, qeqertarmiullu taakku tuluit isikkamik arsaattartuisa klubbiannik, West Hamikkunnik, Premier League-imiittunik, piginnittutut imminnut maanna aamma taasinnaanngorput.
juunip 08-at 2009 13:40

Londonimimi klubbip taassuma, West Hamip, piginnittortaavi tassaapput CB Holding, taakkuninngalu piginnittuuvoq Islandimi aningaaserivik aningaasaliisartoq, Islandimi aningaasatigut ajornartorsiortoqallarmat aningaaserivik aningaasaliisartoq taanna Islandip naalagaaffianit tiguneqarpoq.

West Hamimik maannamut piginnittuugaluarpoq islandimiu Björgòlfur Gudmundsson, taanna nunarsuarmi tamarmi aningaasatigut ajornartorsiortoqarmat annaasaqartorujussuuvoq. Gudmundsson klubbimi aamma siulittaasuugaluarpoq, maannali tassa siulittaasup tullialu, Asgeir Fridgeirsson, tunuarput.

West Hamimi maanna pisortanngorpoq naalagaaffiup aningaaseriviani sulisoq, Andrew Bernhardt. Taanna klubbip nittartagaani allappoq, isikkamik arsaattartunik nutaanik, akisuallaanngitsunik, pissarsiorluni maanna aningaasaliisoqassasoq.

Naatsorsuutigisinnaanngorparput islandimiut West Hamimut maanna qiimmassaasalissasut. Ingerlalluassagunillu Islandimi aningaasaqarnermut immaqa iluaqataassasoq?

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq