Weekendavisen-ip isornartorsiuisartoq ilisaritippaa
- Siumup socialismep isumaa puigorpaa. Finn Lynge Weekendavisimi ullumi apersorneqarluni taama toqqartaarivoq. Finn Lynge Siumut sinnerlugu EU Parlamentimi 1979-imit 1984-ip tungaanut ilaasortaavoq.
Siumukkormiuinnaanngitsut isornartorsiorpai, naalakkersuinermik suliallit inuiaqatigiinnik isornartorsiuisartutoqqap, katuullinut palasiusimasup, isumaginninnermik suliaqartarsimasup, radiomi pisortaasimasup, avatangiisit pillugit suliniuteqartartup Siumullu sinnerlugu EU Parlamentimi ilaasortaasimasup aamma appisaluuppai.
- Naalakkersuinermik suliallit inuiaqatigiinnit nalinginnarmik inooqataasunit avissaarluinnarsimapput, taakkulu pilliutigalugillusooq iluanaarniapilulersimallutik taamaalillutillu isertitaqarnikkut assigiinnginnerujussuaq pilersillugu, Finn Lynge Weekendavisimut ilaatigut oqarpoq.
Nunatta Danmarkimut atanera Finn Lyngep aamma oqaaseqarfigaa.
- Danmarkip nunarput nuannaraa. Nunarput namminersulivinnavianngilaq. Inuit namminersulivinnissaq piumanngilaat. Namminersulernitta kingorna qanoq ililluta namminersulivissinnaanerluta takorloorsinnaanngilara, Finn Lynge oqarpoq nangillunilu:
- Namminersornerput tunngavissiorluaannassangaluarparput. Ilinniagaqarnikkummi angusaluttuuvugut.
Naalakkersuinermik suliallit allat assiginagit Finn Lyngep namminersulivinnissaq upperinngilaa nunarpullu Luxemburg-imut assersuullugu, nuna taanna 400.000-inik inoqartoq nunanik saniliminik pisariaqartitsisorujussuuvoq.
Kalaallit qallunaanik nunatsinni najugaqartunik immikkoortitsisalersimapput tamannalu siornatigut takussaanngikkaluarpoq. Maannali immikkoortitsisoqartalersimasoq Finn Lynge oqarpoq:
- Panikka marluk qaamasunik nujaqarnertik tungujortunillu iseqarnitik pillugu assut ajornartorsiulersimapput. "Danmarkimut angerlarniaritsi", inuit taama oqarfigisaannarpaat. Qaamasunik nujaqarlutillu isillit nunatsinni ullut tamarluinnaasa immikkoortinneqartalerput.
Finn Lyngep eqqaamasalikkersaarummik atuakkiorpoq taannalu septembarimi saqqummersinneqarpoq. Tassanissaaq annertungaatsiartumik isornartorsiuteqarpoq.
