Nunanit allanit

Canadami nunaqarfik aalisarnermik iluatsitsinissaanut kalaallinit ikiorneqartoq

Nunaqarfimmi Pannertuumi Nunavumi Qeqertaalummiittumi qaleralinniarneq iluatsitsiffiulluarpoq. Ilutsitsiffiulluartoq koruuninik milliuunilikkuutaanik nunaqarfimmut iluanaarutaasoq kalaallinit aallarnerneqarpoq.
Nunaqarfik Pannertooq marlunnik ilisimaneqaateqarpoq: qaleralinniarneq ingerlalluartoq aamma kusanartuliorneq, pingaartumik ulinnik (tæppenik) iigarmiunik kusanartorsuarnik nunat assigiinngitsut akornanni aamma ilisimaneqalersimasunik. Assi © : Lindsay Nicole Terry/ Wikimedia Commons
Allattoq Marianne Stenbæk, Montreal, Canada
apriilip 13-at 2019 14:44
Nutserisoq Per Rosing

Qaleralik assut mamarineqalerpoq tamannalu nunaqarfimmi Pannertuumi Nunavumi Qeqertaalummiittumi iluaqutaallualerpoq.

Aalisartut siorna aatsaat taama akigissaartitaatigipput, tamannalu aalisarnerup nalaani nunaqarfimmut 7,5 milliuunit koruuninik isertitsiffiuvoq. Ukioq manna aamma taama annertutiginissaa annerunissaaluunniit ilimagineqarpoq.

Nunaqarfimmiut iluatsitsinertik pillugu Kalaallit Nunaat qutsavigisinnaavaat.

Peter Kilabuk, Nunavup ilinniartitaanermut naalakkersuisua siulleq, qaleralinniarnermik inuussutissarsiuteqarpoq. CBC newsimut oqarpoq puisinniarneq ukiut 30 matuma siornatigut unimmat nunaqarfimmiut qaleralinnik aalisarnermik kalaallit ilinniartissimagaat.

Tamannalu qujamasuutigeqaat.

Ukiut tamaasa januaarimit apriilimut qaleralinnik aalisartoqartarpoq, ukiullu kingulliit 30-t ingerlanerini qaleralinnik aalisarneq nunaqarfimmut ima pingaaruteqartigilersimavoq allaat Canadap naalakkersuisuisa 2013-imi Pannertuumi nutaamik umiarsualiviortitsinerannik kinguneqarluni.

Nunaqarfik Pannertooq marlunnik ilisimaneqaateqarpoq: qaleralinniarneq ingerlalluartoq aamma kusanartuliorneq, pingaartumik ulinnik (tæppenik) iigarmiunik kusanartorsuarnik nunat assigiinngitsut akornanni aamma ilisimaneqalersimasunik.

Aamma atuaruk