Washingtonimi naggataarnersiortoqarpoq

maajip 22-at 2005 13:08

Washingtonimi katersugaasivissuarmi kalaallit saqqummersitsinerat assigiinngitsunilli sammisassaqartitsinerat ullumikkut naammassineqarpoq.

- Ilimagisatsinnit torrallaanerujussuuvugut, inuppassuit maaniinnerat kalaallillu eqqumiitsuliortut torrallaanerat qutsatissaraarput. Kulturimut naalakkersuisoq Henriette Rasmussen taama naliliivoq.

Saqqummersitsineq naggaserlugu oqalugiartoqarlunilu erinarsoqatigiit Aavaat erinarsorput, qilaatersortoqarluni uaajeertoqarlunilu.

Aamma naggammik takuniarneqarsinnaasimapput eqqumiitsuliortut sulisut, tassalu kiinarpaliortoq Peter Kristiansen, ukkusissamik qiperuisoq Marie Nielsen, pinnersaasiortoq Peter Lindberg kiisalu qaanniortoq Maligiaq Padilla.

- Pilersaarut suliarisarlu naammassillugit nuanneqaaq, takornariat amerlaqisut aperisarput, qajaq sumit sanaajunersoq sumullu atorneqartarnersoq. Maligiaq Padilla nassuiaavoq.

Maligiaq Padillap qaanniaa tunissutitut katersugaasivimmut tunniunneqarpoq.

Kulturimut naalakkersuisoq aperaarput, saqqummersitsineq maanna naammassimmat qanoq ingerlariaqqittoqassanersoq:

- Katersugaasivissuarmut isumaqatigiissuteqarpugut, indianerillu pillugit katersugaasivissuarmut qanittukkut ammarneqartumut suleqatigiinnissamut isumaqatigiissuteqarluta. Aamma maanngaannit Canadakkoorluta angerlassaagut, Ottawap katersugaasivissuata kalaallit pillugit taamatut saqqummersitsisoqarnissaa aamma soqutigimmagu. Henriette Rasmussen nassuiaavoq.

Saqqummersitat allat soorlu Gustav Holmip tunumi katersorsimasai Ivar Silisillu assilisai qaammatini marlunni takuniarneqarsinnaagallassapput.