Wæver: Qanga pisimasut kommissionimi aamma sammineqarsinnaapput
Namminersorneq pillugu ataatsimoortumik isumalioqatigiissitat qanga pereersimasunik sammisaqassanersut sammissaqassannginnersullunniit naalakkersuisut siulittaasuata namminersornermullu naalakkersuisup assigiinngitsumik isumaqarfigaat. Naalakkersuisunili assortuuttoqanngitsoq Jørgen Wæver Johansenip erseqqissaatigaa.
Kalaallit Nunaata Danmarkip naalagaaffianut 1953-mi ilanngutsinneqarnissaa sioqqullugu nunatsinni oqartussat amigartunik qinigassinneqarsimanerat namminersorneq pillugu danskit kalaallillu isumalioqatigiissitaanni sammineqassanngitsoq naalakkersuisut siulittaasuat isumaqarpoq, tamannalu ullumanna tamanut nalunaarutigaa. Taama nalunaaruteqarneranut pissutaavoq naalakkersuisooqataa Jørgen Wæver Johansen Nanninersornerullutik Oqartussat nittartagaanni isummersormat apeqqutip tamatuma isumalioqatigiissitami suliarineqarnissaa kissaatigalugu. Apeqqulli inatsisartut folketingillu suliakkiissutaanni eqqaaneqanngimmat sammineqartariaqanngitsoq Hans Enoksen isumaqarpoq.
Naalakkersuisunili siulittaasup pereersut sammeqqunngikkaluarai Jørgen Wæver Johansen isumaqarpoq apeqqutit tamakku kommissionimi avaqqunneqarsinnaanngitsut.
-Oqaasii soorunami tusaatissatut tiguakka, kisianni isumaqarpunga assortuussuteqanngitsugut. Isumaqatigiissutigaarpummi kalaallit qaquguluunniit siunissami uukapaatinneqaqqissanngitsut, Jørgen Wæver Johansen oqarpoq.
Namminersornermut naalakkersuisoq isumaqarpoq kommissionimut suliakkiissummi qanga pisimasut mattunneqanngitsut, taamaattumillu isummersornermi ilaatinneqarnissaat qularinngilaa.
