Martha Lund Olsen: Wæver akisussaassuseqanngitsuliorpoq

Kiffartuussinissamik isumaqatigiissutit atorunnaarsinniarneqarnerisa kingunerisassaasa Kommune Kujallermit isiginiarneqannginnerat akisussaassuseqanngitsuliorneruvoq, attaveqaqatigiinnermut naalakkersuisoq Martha Lund Olsen, Borgmesteri Jørgen Wæver Johansen-imut ammasumik taama allagaqarpoq.
Allattoq Malik Brøns, Anton Gundersen Lihn
decembarip 02-at 2016 13:39

Jørgen Wæver Johansenip kiffartuussinissamut isumaqatigiissutit isornartorsiorlugit naalakkersuisunut novembarip 23-iani ammasunik allagaqarpoq. Isumaqatigiissutit taamaatinneqassasut nutaamillu isumaqatigiissusiussasut ilaatigut allappoq. Neqerooruteqartut assigiimmik periarfissinneqarsimanersut kommunip allakkamini aamma qularnarsisippaa.

Taamannali isornartorsiuineq Martha Lund Olsenip allakkamini ammasuni tunngavisaqannginnerarpaa.

Kommunip kiffartuussinissamik isumaqatigiissutit atorunnaarsinneqarnerisa kingunerisinnaasai eqqarsaatiginngivillugit isumaminik piumasaqaatiminillu ataneqarsinnangitsunik saqqummiussisaqattaarnera akisussaassuseqanngitsuliornerusuusoq, Martha Lund olsenip tikuarpaa.

Aamma ima erseqqissaarivoq:

- Taakku saniatigut inaarutaasumik erseqqissaatigissavara, isumaqatigiissutaareersut taamaatinneqarsinnaanngimmata imaluunniit taamaatinneqassanngimmata.

Naalakkersuisut assigiimmik ilumut periarfissiisimanersut, Kommunip nalornilersitsimmat, naalakkersuisoq isornatussaqanngineraavoq.

- Akerlianik suliami naammassineqartumi sullissisut assigiinngitsut aaqqiissutissanik, ullumikkut ilisimasatsinnit allaanerusunik neqerooruteqarnissamut assigiimmik periarfissinneqarsimapput.

Jørgen Wæver Johansen pisoq pillugu KNR-imut oqaaseqarumanngilaq, kiffartuussinissamullu isumaqatigiissutit pillugit oqaaseqarumanani, soorlu aamma Martha Lund Olsenip ammasumik allagaqaateqarneranut oqaaseqarumanngitsoq.
Naalakkersuisunik isornartorsiuinini pillugu aamma oqaaseqarumanngilaq, isumaqatigiissutillu atorunnaarsinneqarnissaanik kissaatini pillugu oqaaseqarumanani.

KNR-ip borgmesteri arlaleriarluni oqaaseqartinniarsimagaluarpaa, borgmesterilli ammasumik nammineq allagaqaataa innersuussutigiinnarneqartarluni.

Kiffartuussinissamik isumaqatigiissutit ukioq manna septembarip ulluisa 13-ianni saqqummiunneqarmatali Jørgen Wæver Johansen tamakku pillugit Radioaviisimut oqaaseqarusussimanngilaq.

Jørgen Wæver Johansenip naalakkersuisunut ammasumik allagaa aamma Kommuni Kujalliup eqqaamassutissatut allagaataa qallunaatuinnaq allagaasoq ataani kakkigussat atuarneqarsinnaapput.

 

Aamma atuaruk