Værestedet Naapiffik Aarhusimiittoq nuunneqartoq
Nuunneranut pissutaavoq Arhusimi illoqarfiut ilaani Sydhavnimi Danske Banki nutaamik qitiusumik allaffeqarfiliortitsinera.
”Naapiffik” Sydhavnimiiginnassaaq sulili sumiiffissavia aaliangiunneqarani. Utaqqiisaagallartumilli inissanik, Ole Thrillumip
Kirkens Korshærimi pisortaagallartup nuannaarutigisaanik, tunineqarsimavoq.
- Ajorseriarnavianngilaq, pitsanngoriaannarlunili. Initussusaa taamaaginnapajaassaaq inissisimalluarnerlullunilu, Ole Thrillum oqarpoq.
Aamma atuaruk IKIORTARIALLIT Danmarkimi kalaallinut ajornartorsiortunut kommunit ikiuutissaat assigiinngeqisut
Inuuniarniermikkut ajornartorsiortut amerliartortut
“Naapiffik” 2014-mi Aarhusip kommuniata Kirkens Korshær suleqatigalugu pilersippaat.
Tamanna pivoq angerlarsimaffeqanngitsut kiisalu inuuniarnermik ajornartorsiuteqartut Aarhusip illoqarfiani, pingaartumik Vesterbro Torvimi, aalakoorlitillu nipiliortarneri inuussutissarsiuteqartunit naammagittaalliutigineqarmata.
”Naapiffik” ammarmat inuuniarnermikkut ajornatorsiuteqartut naapittarfittaarput. Ilaatigullu Kalaallit illuata immikkoortoqarfianit ”Kammak”-mit kommunillu katsorsaasuinik pulaarneqartarlutik.
”Naapiffik” piuinnarnissaanut pissutissaqarluartoq Ole Thrillumi isumaqarpoq.
- Ullormut atuisut 40-t missaanniittut takkuttarput, atuisut ataatsimut isigalugit 100 missaanniillutik. Erseqqissunik kisitsisaateqanngikkaluarlunga maluginiarpara pisariaqartitsisut amerliartortut, Ole Trhillum oqarpoq.
Aarhusip kommuniata ”Naapiffik” sumerpiaq inissinneqarumaarnersoq aguustip naanerani suliaralugu aallartissavaat, kingornalu tusarniaasoqarumaarluni.