Vædderenip pipallattoqarnera qulaarpaa
Eqqunngitsumik aalisarsimanermi nalunaarsuisut sorsuuteeqqamit Vædderen-mit naammattoorneqaqqittut, Grønlandskommando-p internet-kut quppersagaani allaaserineqarpoq.
Eqqunngitsumik log-bogimut nalunaarsuisimasoq tassaavoq, Litauenimiut raajarniutaat tunumi aalisartoq Arctic Viking.
Sisamanngormat sorsuuteeraq Vædderen kilisaammut ikisimavoq, paasineqarporlu kilisaatip naalagaata raajat pisat logbog-mut nalunaarsorsimasai pisaareersut oqimaassusaannut naleqqutinngitsut, raajallu pisaasimasut nalunaarutigineqarsimasuniit amerlanerusut.
Kilisaatip Arctic Viking-ip raajanik pisaqartarsimanini eqqunngitsumik Grønlandfiskerilicenskontrol-mut Grønlandskommando-mullu nalunaarutigisimavai.
Raajat pisaasimasut nalunaarutigineqarsimanngitsut tuninerini nalingi katillugit 117.500 koruuniusinnaasimammata, Arctic Viking, amerlaqataanik akiligassinneqarpoq, kilisaatillu naalagaa 58.000 koruuninik akiligassinneqarluni.
